Yava dengizida Indoneziyaning halokatga uchragan “Boing” samolyoti qurbonlarini izlash bo‘yicha operatsiyasi ishtirokchisi — 48 yoshli dayver Sauchrul Anto cho‘kib ketdi. Bu haqda Indoneziya milliy qidiruv-qutqaruv agentligining Instagram’dagi sahifasida ma’lum qilindi.
Reuters ma’lumotlariga ko‘ra, Anto qidiruv-qutqaruv agentligining muhim xodimlaridan biri edi. U 2014 yili Kalimantan (Borneo)da qulagan AirAsia samolyoti qurbonlarini izlash ishlarida ham qatnashgan edi.
Indoneziyaning Lion Air aviakompaniyasiga tegishli “Boing” samolyoti 29-oktabr kuni, Jakarta aeroportidan havo ko‘tarilganidan 13 daqiqa o‘tib Yava dengiziga qulagan edi. Samolyot bortida 189 kishi bo‘lgan. Ularning bari halok bo‘lgan.
3-noyabr holatiga ko‘ra qutqaruvchilar qurbonlar jasadlarining 73 bo‘lagini topib, suvdan olib chiqishga muvaffaq bo‘ldi. Layner halokati sabablari hozircha noma’lum.
Izoh (0)