Bugun, 31-oktabr kuni Toshkentda Shanxay hamkorlik tashkiloti Mintaqaviy aksilterror tuzilmasi Ijroiya qo‘mitasi tomonidan “Terrorizmga qarshi kurash – chegara bilmas hamkorlik” mavzusida oltinchi xalqaro ilmiy-amaliy konferensiya tashkil qilindi. Bu haqda O‘zA xabar berdi.
Unda SHHTga a’zo, kuzatuvchi hamda muloqot bo‘yicha sherik mamlakatlar delegatsiyalari, xalqaro tashkilotlar, ilmiy-tadqiqot markazlari vakillari ishtirok etdi.
Tashkilot 2017-yilgi faoliyati davomida qator terroristik aktlarning oldini olishga muvaffaq bo‘ldi, 50 dan ortiq terroristik guruhlar faoliyatiga chek qo‘yilib, xalqaro qidiruvda bo‘lgan 150 terrorchi qo‘lga olindi, deyiladi xabarda.
Ta’kidlanishicha, o‘tgan yilda qo‘poruvchilik va buzg‘unchilik g‘oyalari aks etgan 500 mingdan ziyod materialni o‘zida jamlagan 80 ming, terroristik va taqiqlangan diniy tashkilotlarning 360 sayti faoliyati to‘sib qo‘yilib, internet manbalarini yuritayotgan 122 kishiga nisbatan jinoiy ish qo‘zg‘atilgan.
Konferensiya 1-noyabr kuni ham o‘z ishini davom ettiradi. Tadbirda ishtirokchilar SHHT makonida tinchlik va barqarorlikka erishish, terrorizm va ekstremizmga qarshi kurashish, uning oqibatlarini bartaraf etish bo‘yicha o‘zaro tajriba almashish imkoniga ega bo‘ladi.
Izoh (0)