“Novo Nordisk” jamoasi qandli diabet kasalligi bilan og‘rigan velosportchilardan tashkil topgan birinchi professional jamoa hisoblanadi. Jamoa 2019-yilgi mavsum uchun to‘rt nafar sportchi – Oliver Bexringer (Shveysariya), Deklan Irvin, Sam Munday (Avstraliya) hamda o‘zbekistonlik Ulug‘bek Saidovlar bilan shartnoma tuzdi, deb xabar beradi MOQ matbuot xizmati.
22 yoshli Ulug‘bek Saidov Toshkent shahrida tavallud topgan. U “Novo Nordisk” jamoasi a’zosiga aylangan Markaziy Osiyodan bo‘lgan dastlabki professional velosportchidir. Ulug‘bekka 9 yoshligida qandli diabetning birinchi darajasi tashxisi qo‘yilgan.
Ma’lumot o‘rinda,Toshkentda diabet kasalligi bilan og‘rigan yoshlar uchun Queen Sport velosport klubi faoliyat olib boradi. Saidov 15 yoshida ushbu jamoa a’zosi bo‘lgan. O‘shandayoq u “Novo Nordisk” nazariga tushgan. Avvaliga Ulug‘bek klubning o‘smirlar jamoasi sharafini himoya qilgan. Mehnatsevarlik va motivatsiya evaziga u kasallikka qarshi kurasha oldi, shu bilan bir qatorda sportdagi natijalarini ham yaxshiladi. 2017-yilga kelib esa “Novo Nordisk”ning zaxira jamoasi tarkibidan o‘rin oldi.
“Professionallar jamoasiga o‘tishga intilardim. “Novo Nordisk” sharafini himoya qilayotganimdan faxrlanaman. Yelkamda qanday mas’uliyat borligini his qilib turibman. So‘nggi bir necha yil ichida men sport faoliyatimni rivojlantirish va qandli diabetga qarshi kurashish yo‘lida oldinga katta qadam tashlay oldim. Dastlabki yil oson bo‘lmasligini bilaman. Ammo, men professional sportda, shuningdek, hayot yo‘limda yuqori marralarga erishishga qat’iy bel bog‘laganman”, – dedi Ulug‘bek.
“Bir necha yil davomida O‘zbekistonda sport qay tarzda rivojlanayotganini kuzatib kelyapman. Shuningdek, Ulug‘bekning muvaffaqiyatlaridan ham hayratdaman. U O‘zbekistonda qandli diabet bilan hastalangan insonlar uchun haqiqiy o‘rnak namunasi bo‘ladi deb hisoblayman”, – dedi Fil Sazerlend.
Ma’lumot uchun, AQSh klubi hisoblangan “Novo Nordisk” professional jamoa maqomiga ega. Jamoa 2021-yili velosport olamining eng nufuzli musobaqasi – “Tur de Frans” bahslarida ham ishtirok etadi. Bu orqali Ulug‘bek Jamoliddin Abdujabborovdan so‘ng ushbu nufuzli turnirda ishtirok etgan ikkinchi o‘zbekistonlik velosportchiga aylanishi kutilmoqda.
Izoh (0)