Kecha, 23-oktabr kuni O‘zbekiston kamondan otish federatsiyasi raisi Otabek Imomov hamkorlik Turkiyada mamlakat Milliy olimpiya qo‘mitasi prezidenti, Xalqaro kamondan otish federatsiyasi rahbari Ug‘ur Erdener bilan uchrashdi, deb xabar beradi MOQ matbuot xizmati.
Uchrashuv chog‘ida tomonlar bir qator muhim masalalar bo‘yicha kelishuvga erishdi. Unga ko‘ra, turkiyalik murabbiylar O‘zbekistonga tashrif buyurib, sportchilarimiz uchun mashg‘ulotlar, mahorat saboqlari tashkil etadi. Shuningdek, seleksiya masalasida ham murabbiylarimizga yaqindan yordam beradi. Undan tashqari, O‘zbekiston terma jamoasi a’zolari Turkiyada o‘quv-mashg‘ulot yig‘inlarini o‘tkazadi. Muhim musobaqalarga aynan turkiyalik sportchilar bilan birga tayyorgarlik ko‘rishadi.
Eslatib o‘tamiz, avgust oyida Milliy olimpiya qo‘mitasi prezidenti Umid Ahmadjonov Turkiyaga safari davomida Butunjahon etnosport konfederatsiyasi rahbari, Kamonchilar fondi vasiylik kengashi raisi, Turkiya yoshlar fondi Oliy maslahat kengashi a’zosi Najmiddin Bilol Erdo‘g‘on bilan uchrashuv o‘tkazgan va hamkorlikni kuchaytirish, aloqalarni yanada mustahkamlash, kamondan o‘q otish sport turiga oid bir qator masalalarni muhokama qilgandi.
Izoh (0)