«Ново Нордиск» жамоаси қандли диабет касаллиги билан оғриган велоспортчилардан ташкил топган биринчи профессионал жамоа ҳисобланади. Жамоа 2019 йилги мавсум учун тўрт нафар спортчи – Оливер Бехрингер (Швейцария), Деклан Ирвин, Сам Мундай (Австралия) ҳамда ўзбекистонлик Улуғбек Саидовлар билан шартнома тузди, деб хабар беради МОҚ матбуот хизмати.
22 ёшли Улуғбек Саидов Тошкент шаҳрида таваллуд топган. У «Ново Нордиск» жамоаси аъзосига айланган Марказий Осиёдан бўлган дастлабки профессионал велоспортчидир. Улуғбекка 9 ёшлигида қандли диабетнинг биринчи даражаси ташхиси қўйилган.
Маълумот ўринда,Тошкентда диабет касаллиги билан оғриган ёшлар учун Queen Sport велоспорт клуби фаолият олиб боради. Саидов 15 ёшида ушбу жамоа аъзоси бўлган. Ўшандаёқ у «Ново Нордиск» назарига тушган. Аввалига Улуғбек клубнинг ўсмирлар жамоаси шарафини ҳимоя қилган. Меҳнатсеварлик ва мотивация эвазига у касалликка қарши кураша олди, шу билан бир қаторда спортдаги натижаларини ҳам яхшилади. 2017 йилга келиб эса «Ново Нордиск»нинг захира жамоаси таркибидан ўрин олди.
«Профессионаллар жамоасига ўтишга интилардим. «Ново Нордиск» шарафини ҳимоя қилаётганимдан фахрланаман. Елкамда қандай масъулият борлигини ҳис қилиб турибман. Сўнгги бир неча йил ичида мен спорт фаолиятимни ривожлантириш ва қандли диабетга қарши курашиш йўлида олдинга катта қадам ташлай олдим. Дастлабки йил осон бўлмаслигини биламан. Аммо, мен профессионал спортда, шунингдек, ҳаёт йўлимда юқори марраларга эришишга қатъий бел боғлаганман», – деди Улуғбек.
«Бир неча йил давомида Ўзбекистонда спорт қай тарзда ривожланаётганини кузатиб келяпман. Шунингдек, Улуғбекнинг муваффақиятларидан ҳам ҳайратдаман. У Ўзбекистонда қандли диабет билан ҳасталанган инсонлар учун ҳақиқий ўрнак намунаси бўлади деб ҳисоблайман», – деди Фил Сазерленд.
Маълумот учун, АҚШ клуби ҳисобланган «Ново Нордиск» профессионал жамоа мақомига эга. Жамоа 2021 йили велоспорт оламининг энг нуфузли мусобақаси – «Тур де Франс» баҳсларида ҳам иштирок этади. Бу орқали Улуғбек Жамолиддин Абдужабборовдан сўнг ушбу нуфузли турнирда иштирок этган иккинчи ўзбекистонлик велоспортчига айланиши кутилмоқда.