Andijon viloyatida afv etilgan shaxslarga qanday yordam ko‘rsatilmoqda? Ularning ish bilan ta’minlanishi, salomatligini tiklab olishlari uchun yetarlicha e’tibor berilyaptimi? Jurnalist Mirolim Isajonov shu va boshqa savollarga viloyat hokimligi huzuridagi ijtimoiy muhofaza qilish markazi rahbari o‘rinbosari K.Egamberdiyev bilan suhbatlashdi.
“Jazo muddatini o‘tab, ozod bo‘lib qaytgan fuqarolarni ijtimoiy hayotga moslashib, foydali mehnat bilan shug‘ullanishlari, sog‘lom turmush tarzini yo‘lga qo‘yib, jamiyatda munosib o‘rin topishlari uchun muntazam ravishda yaqindan ko‘mak berib kelmoqdamiz. Bu borada mahalliy hokimliklar bilan birga jamoat tashkilotlari, siyosiy partiyalarning ham insonparvarlik tadbirlarida faol qatnashayotganliklarini alohida ta’kidlash joiz”, — deydi K.Egamberdiyev.
Joriy yilning o‘tgan davri mobaynida viloyat ichki ishlar idoralari tomonidan profilaktik hisobga olingan 1285 nafar jazoni ijro etish muassasalaridan ozod etilgan shaxslarga jami 1 milliard 289 million 158 ming 330 so‘m miqdorida moddiy yordam pullari o‘rnatilgan tartibda hududlardagi Xalq banki filiallari orqali yetkazib berildi. Ularning barchasi joylardagi tibbiyot birlashmalari tomonidan tibbiy ko‘rikdan o‘tkazildi xamda 8 nafariga yotib davolanishlariga amaliy yordam ko‘rsatildi. Bandlikka ko‘maklashuv markazlari hamkorligida 791 nafar fuqaro ishga joylashtirilib, 201 nafariga fuqarlik pasportlarini tiklab olishiga ko‘maklashildi.
“Shu yilning 30-avgust kuni O‘zbekiston Respublikasi Prezidentining ‘Ozodlikdan mahrum etish jazosini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida’gi Farmoniga muvoqif 215 nafar shaxs jazoni ijro etish muassasalaridan ozod qilinib, oilasi va yaqinlari bag‘riga qaytarildi. Shulardan 35 nafari viloyatimizda istiqomat qiluvchi fuqarolar bo‘lib, ularga ham yetarlicha yordam berildi va bunday ezgu ishlar hamon davom etmoqda.
Darhaqiqat, mazkur markaz va bir qancha davlat hamda jamoat tashkilotlari hamkorligida ozodlikka chiqqan yurtdoshlarimizning og‘irini yengil, uzog‘ini yaqin qilishda beminnat yordam qo‘llari cho‘zilyapti.
Andijon shaxrida yashovchi V.Tolibjonovaning suyultirilgan gaz balloniga ehtiyoji borligi to‘g‘risidagi murojaati joyida hal etilib, u “Muhammad qurilish servis” MChJda doimiy ish o‘rniga ega bo‘ldi”, — deydi K. Egamberdiyev.
Rossiya Federatsiyasining Novosibirsk shahri sudi tomonidan 2010-yilda 8 yilga ozodlikdan mahrum etilib, shu yilning mart oyida doimiy istiqomat qiluvchi joyiga – Izboskan tumaniga qaytib kelgan S.Ibragimova ham viloyat hokimligi nazaridan chetda qolmadi. Unga viloyat xotin-qizlar qo‘mitasi qoshidagi “Mehrimiz sizga” NTN tomonidan tadbirkorlik faoliyatini boshlashi uchun 1 dona zamonaviy elektron chok mashinasi, 1 dona averlo mashinasi, 1 dona par dazmol va stoli, 1 o‘ram mato va chevarchilik uskuna jamlanmasi taqdim etildi.
Izboskanlik N.Qirg‘izova oilaviy chorvachilikni rivojlantirish istagi borligini aytgach, unga “Milliy bank”ning Izboskan tuman bo‘limidan imtiyozli kredit olishida yaqindan ko‘maklashildi. Shuningdek, tuman hokimligi tomonidan 1 dona gaz plitasi va gaz balloni ham tuhfa etildi.
“Kech bo‘lsa-da, qilgan ishimdan juda pushaymonman. Ota-ona, oila qadrini, ozodlikning nechog‘li buyuk ne’mat ekanini angladim. Mening jinoyatimni afv etgan Prezidentimizdan, xalqimizdan cheksiz minnatdorman. Ayni paytda hayotimni yangidan boshlab, yurtimiz ravnaqi yo‘lida foydali mehnat qilishimga mahalla faollari, qo‘ni-qo‘shnilar yaqindan yordam bermoqda. Ularga ham katta rahmat”, - deydi N.Qirg‘izova ko‘zlari to‘la yosh ila.
Izoh (0)