Андижон вилоятида афв этилган шахсларга қандай ёрдам кўрсатилмоқда? Уларнинг иш билан таъминланиши, саломатлигини тиклаб олишлари учун етарлича эътибор бериляптими? Журналист Миролим Исажонов шу ва бошқа саволларга вилоят ҳокимлиги ҳузуридаги ижтимоий муҳофаза қилиш маркази раҳбари ўринбосари К.Эгамбердиев билан суҳбатлашди.
«Жазо муддатини ўтаб, озод бўлиб қайтган фуқароларни ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун мунтазам равишда яқиндан кўмак бериб келмоқдамиз. Бу борада маҳаллий ҳокимликлар билан бирга жамоат ташкилотлари, сиёсий партияларнинг ҳам инсонпарварлик тадбирларида фаол қатнашаётганликларини алоҳида таъкидлаш жоиз», — дейди К.Эгамбердиев.
Жорий йилнинг ўтган даври мобайнида вилоят ички ишлар идоралари томонидан профилактик ҳисобга олинган 1285 нафар жазони ижро этиш муассасаларидан озод этилган шахсларга жами 1 миллиард 289 миллион 158 минг 330 сўм миқдорида моддий ёрдам пуллари ўрнатилган тартибда ҳудудлардаги Халқ банки филиаллари орқали етказиб берилди. Уларнинг барчаси жойлардаги тиббиёт бирлашмалари томонидан тиббий кўрикдан ўтказилди хамда 8 нафарига ётиб даволанишларига амалий ёрдам кўрсатилди. Бандликка кўмаклашув марказлари ҳамкорлигида 791 нафар фуқаро ишга жойлаштирилиб, 201 нафарига фуқарлик паспортларини тиклаб олишига кўмаклашилди.
«Шу йилнинг 30 август куни Ўзбекистон Республикаси Президентининг ‘Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида’ги Фармонига мувоқиф 215 нафар шахс жазони ижро этиш муассасаларидан озод қилиниб, оиласи ва яқинлари бағрига қайтарилди. Шулардан 35 нафари вилоятимизда истиқомат қилувчи фуқаролар бўлиб, уларга ҳам етарлича ёрдам берилди ва бундай эзгу ишлар ҳамон давом этмоқда.
Дарҳақиқат, мазкур марказ ва бир қанча давлат ҳамда жамоат ташкилотлари ҳамкорлигида озодликка чиққан юртдошларимизнинг оғирини енгил, узоғини яқин қилишда беминнат ёрдам қўллари чўзиляпти.
Андижон шахрида яшовчи В.Толибжонованинг суюлтирилган газ баллонига эҳтиёжи борлиги тўғрисидаги мурожаати жойида ҳал этилиб, у «Муҳаммад қурилиш сервис» МЧЖда доимий иш ўрнига эга бўлди», — дейди К. Эгамбердиев.
Россия Федерациясининг Новосибирск шаҳри суди томонидан 2010 йилда 8 йилга озодликдан маҳрум этилиб, шу йилнинг март ойида доимий истиқомат қилувчи жойига – Избоскан туманига қайтиб келган С.Ибрагимова ҳам вилоят ҳокимлиги назаридан четда қолмади. Унга вилоят хотин-қизлар қўмитаси қошидаги «Меҳримиз сизга» НТН томонидан тадбиркорлик фаолиятини бошлаши учун 1 дона замонавий электрон чок машинаси, 1 дона аверло машинаси, 1 дона пар дазмол ва столи, 1 ўрам мато ва чеварчилик ускуна жамланмаси тақдим этилди.
Избосканлик Н.Қирғизова оилавий чорвачиликни ривожлантириш истаги борлигини айтгач, унга «Миллий банк»нинг Избоскан туман бўлимидан имтиёзли кредит олишида яқиндан кўмаклашилди. Шунингдек, туман ҳокимлиги томонидан 1 дона газ плитаси ва газ баллони ҳам туҳфа этилди.
«Кеч бўлса-да, қилган ишимдан жуда пушаймонман. Ота-она, оила қадрини, озодликнинг нечоғли буюк неъмат эканини англадим. Менинг жиноятимни афв этган Президентимиздан, халқимиздан чексиз миннатдорман. Айни пайтда ҳаётимни янгидан бошлаб, юртимиз равнақи йўлида фойдали меҳнат қилишимга маҳалла фаоллари, қўни-қўшнилар яқиндан ёрдам бермоқда. Уларга ҳам катта раҳмат», - дейди Н.Қирғизова кўзлари тўла ёш ила.
Изоҳ (0)