Farg‘ona viloyatining Beshariq tumanidan bo‘lgan R. Qodirova oldin firibgarlik jinoyatini sodir etib, 4 marotaba sudlanganiga qaramay Furqat tumanida yashovchi 8 nafar fuqaroning 111 million so‘mdan ziyod mablag‘ini o‘zlashtirib yubordi. Bu haqda “Daryo” muxbiri Azizjon Ermatov xabar berdi.
Shu yilning mart oyida R.Qodirova Furqat tumani Qushchi qishlog‘ida yashovchi Sh.Q.ning xonadoniga borib, o‘zini ulgurji mosh savdosi bilan shug‘ullanuvchi shaxs sifatida tanishtirgan. Sh.Q.ni aldab, unga tegishli bo‘lgan 12 656 700 so‘mlik 3 tonnadan ziyod moshni pulini 10 kun ichida berishini aytib, olib ketgan. Moshni boshqa bir savdogarga sotib, tushgan pullarni o‘z ehtiyoji uchun sarflab yuborgan.
Jinoyat ishlari bo‘yicha Furqat tuman sudidan ma’lum qilishlaricha, uddaburon ayol shu tariqa mosh “operatsiyasi” orqali 8 nafar fuqaroga 111 million so‘mdan ziyod moddiy zarar yetkazgan.
Sud R.Qodirovaga jazo turi va me’yorini tayinlashda uning aybiga to‘liq iqrorligini, chin ko‘ngildan pushaymonligini, ayolligini, qaramog‘ida 2 nafar farzandi borligini, oilaviy sharoitini, jinoyat natijasida yetkazilgan zararlar qoplanmaganini, jabrlanuvchilarning qonuniy chora ko‘rish haqidagi talabini inobatga oldi. Sud hukmi bilan unga 5 yil-u 2 oy muddatga ozodlikdan mahrum qilish jazosi tayinlandi. Shuningdek, prokuror da’vosi qanoatlantirilib, R.Qodirovadan 8 nafar jabrlanuvchi foydasiga 111 million 715 ming so‘m moddiy zarar undirish belgilandi.
Izoh (0)