Bugungi kunda Buxoro viloyatida 33 gazeta va 3 jurnal chop etiladi. Ular viloyatda amalga oshirilayotgan islohotlar ahamiyati, ro‘y berayotgan o‘zgarish va yangiliklar mazmun-mohiyatini yoritish borasida muayyan yutuqlarga erishib kelmoqda, deya xabar beradi O‘zA.
Biroq, sohada olib borilgan monitoring natijalari hududiy nashrlarning aksariyatida bir qator muammolar borligini ko‘rsatdi. Avvalo, ularning ommabopligi yetarli darajada emas, obunachilar soni kam. Bu o‘z o‘zidan iqtisodiy qiyinchiliklarga sabab bo‘ladi.
Xo‘sh, hududiy nashrlar adadi va o‘quvchilar sonini ko‘paytirish uchun nimalarga e’tibor berish kerak? Iqtisodiy barqarorlikka erishish uchun nashrlar qanday chora-tadbirlarni amalga oshirishi zarur?
Abu Ali ibn Sino nomidagi Buxoro viloyati axborot-kutubxona markazida “Hududiy bosma nashrlar holatini yaxshilash bo‘yicha taklif va tavsiyalar” mavzuida o‘tkazilgan seminar-treningda shu kabi savollar atroflicha muhokama qilindi.
O‘zbekiston mustaqil bosma ommaviy axborot vositalari va axborot agentliklarini qo‘llab-quvvatlash va rivojlantirish jamoat fondi, O‘zbekiston matbuot va axborot agentligi hamkorligida tashkil etilgan tadbirda viloyatdagi nashrlar va fuqarolik jamiyati institutlari vakillari, soha mutaxassislari ishtirok etdi.
Muammo haqida gap borar ekan, tadbirda hududiy nashrlar bundan keyin ham yashab qolishi uchun o‘quvchiga zarur va qiziqarli materiallarni chop etishi, aksincha, internet va boshqa manbalardan olingan turli asossiz materiallardan voz kechish lozimligi ta’kidlandi.
Hududiy nashrlarda axborotlarni tayyorlash, jurnalistik surishtiruv o‘tkazish, turli sohalarda amalga oshirilayotgan islohotlarning borishi yuzasidan jamoatchilik nazoratini o‘rnatishda ommaviy axborot vositalarining roli, ijodkorning kasb etikasi tamoyillari xususida fikr almashildi. Nashrlarda qonun hujjatlari nomi va normalariga doir ma’lumotlarni berishda rasmiy manbalardan foydalanish, shuningdek, axloq-odob mavzularini yoritishda tegishli huquqiy hujjatlarda belgilangan me’yorlarga rioya qilish lozimligi ham alohida ta’kidlandi.
Shu o‘rinda O‘zbekiston matbuot va axborot agentligi tomonidan 2017-yil va 2018-yilning o‘tgan davrida mamlakat bo‘yicha “qoidabuzar” nashrlarga nisbatan 200 dan ortiq ko‘rsatma va taqdimnoma kiritilgani ma’lum qilindi. Ular orasida Buxoro viloyatidagi ommaviy axborot vositalari ham bor.
Izoh (0)