Oldinroq “Daryo” e’lon qilgan materialda “Nuroniy” jamg‘armasi raisi o‘rinbosari “O‘zbekenergo” rahbariyatiga murojaat etib, tizimni o‘g‘rilardan tozalashga chaqirgani xabar qilingan edi. O‘z chiqishida Sharof Ubaydullayev, jumladan, Toshkentda 1300 ta transformatorni sotib yuborilganini aytgandi. Shu munosabat bilan Majburiy ijro byurosi “transformator ishi” yuzasidan “Daryo”ga bayonot berdi. Quyida bayonot matnini to‘liq keltiramiz.
Joriy yilning 4-oktabr kuni Internetga “‘Nuroniy’ jamg‘armasi raisi o‘rinbosari ‘O‘zbekenergo’ rahbariyatini tizimni o‘g‘rilardan tozalashga chaqirdi” nomli ma’lumot joylashtirilgan.
Ma’lumotda, “O‘zbekenergo” AJ raisi o‘rinbosari Ro‘ziqul Raimovga, Toshkent shahrida 1300 ta transformator sotib yuborilganini, sohada korrupsiyani yo‘q qilish kerakligini, sohadagi tartibni o‘rnatishda prokurorlarning o‘rni bo‘lishi lozimligini, Majburiy ijro byurosi faoliyatida bir qator kamchiliklar mavjudligini bidirgan.
Aniqlanishicha, joriy yilning 3-oktabr kuni “Xalqaro press-klub”ning “Energetika resurslari: islohotlar davrida tejamkorlik va iste’mol madaniyatidagi muammolarning tahlili” mavzuidagi sessiyasi bo‘lib o‘tgan.
Ushbu sessiyada “O‘zbekneftgaz” AJ boshqaruv raisi o‘rinbosari O.Temirov, “O‘ztransgaz” AJ raisi Sh.Tursunov, “O‘zbekenergo” AJ raisi o‘rinbosari R.Rayimov hamda Majburiy ijro byurosi direktori o‘rinbosari Sh.Aminovlar ishtirok etgan.
Tadbirda, “Nuroniy” jamg‘armasi Respublika boshqaruvi raisi o‘rinbosari lavozimida faoliyat yuritib kelayotgan Sh.Ubaydullayev, R.Raimovga yuzlanib, Toshkent shahrida 1300 ta transformatorlar noqonuniy sotilganini, transformatorlarning narxi 10 mingdan 50 ming AQSh dollariga borishini, sohadagi talon-tarojlik tugatilmasa tartib o‘rnatib bo‘lmasligini bildirgan.
Shundan so‘ng, Sh.Ubaydullayev tadbir ishtirokchisi Sh.Aminovga yuzlanib, quyidagi:
— Birgina Toshkent shahrida 1300 ta transformator sotib yuborilsa, buni nazorat qiladigan prokurorlar yo‘qmi, sizning ishtirokingiz yo‘qmi?;
— Siz 500 so‘m-1000 so‘m to‘lay olmagan faxriylar, nogironlarning ortidan quvib yuribsiz, bizda ro‘yxatlari ham bor. Siz nogironlarga boshqacharoq qarang. To‘lov imkoniyatlari juda kulgili. Qayerga to‘lashini bilmaydi, ilgari mayli, elektr yomon, gaz yomon deymiz, uyga kelib olardi (to‘lovlarni). Hozir sizning ho‘-o‘ idoralaringizni qidirib borishi kerak. Lekin pulga, to‘lovga kelsa, elektr o‘chib qolayapti, anavi kamchilik bo‘layapti, desa sizning pogonlilaringiz nima deydi, bilasizmi? “Bizning bunga aloqamiz yo‘q, ta’minot energiyada, biz faqat pul olishni bilamiz, deydi. Buni bitta qo‘lga berish kerak: yo siz rahbarlik qiling, yoki ta’minot bilan birga;
— O‘rtoq prokuror, sizning Majburiy ijro byuroingizda kamchiliklar shunaqangi ko‘p. Bir-birini so‘yib qo‘ygan rahbarlar sizga qaraydimi? Amal talashib yotibdi. Shuning uchun pulning orqasidan emas, adolatning orqasidan quving, — degan fikrlarni bildirgan.
Majburiy ijro byurosi Sh.Ubaydullayev tomonidan keltirilgan ushbu fikrlarini noxolis, obyektiv yondashilmagan va asossiz deb hisoblaydi.
Izoh : Aynan, ta’minotchi korxonalar tomonidan idoraviy nazorat lozim darajada o‘rnatilmaganligi va iste’molchilarning shartnoma majburiyatlariga rioya etishi ta’minlanmaganligi, sohada korrupsiya va talon-tarojliklarga yo‘l qo‘yilganligi kabi to‘planib qolgan o‘tkir muammolarni bartaraf etish maqsadida, Davlat rahbarining 29.05.2017-yildagi PF-5059-sonli Farmoni bilan Majburiy ijro byurosi tashkil etilgan.
Majburiy ijro byurosi faoliyatini boshlagan (2017-yil iyul,) davridan buyon, “O‘zbekenergo” AJ tizimidagi mansabdor va boshqa shaxslar tomonidan Toshkent shahri yoki boshqa hududlarda elektr transformator uskunalarining noqonuniy sotilishi va talon-taroj qilinishi bilan bog‘liq murojaatlar kelib tushmagan va jinoyat ishlari qo‘zg‘atilmagan.
Sh.Aminov, nutqida foydalanilgan energiya resurslar uchun mablag‘ to‘lay olmagan faxriylar va nogironlar emas, balki to‘lov qobiliyatiga ega bo‘la turib, to‘lamayotgan iste’molchilar bugungi kunda ko‘pchilikni tashkil etishiga to‘xtalib o‘tgan.
Shuningdek, 29.05.2017-yildagi PF-5059-sonli Farmonga muvofiq, elektr va gaz taqsimlash tarmoqlaridagi nosozliklarni bartaraf etish Byuro organlarining vazifasiga kirmaydi.
Byuro davlat inspektorlari energiya resurslari va suv ta’minoti bo‘yicha to‘lovlar (naqd va naqdsiz)ni qabul qilishda iste’molchilarga qulaylik tug‘dirish maqsadida, to‘lov terminali va termoprinterlar bilan to‘liq ta’minlangan, Byuroning hududiy (tuman, shahar) bo‘limlarida bank maxsus kassalari tashkil etilgan.
Bundan tashqari, Byuroning Yakkabog‘ tuman bo‘limi sobiq boshlig‘i B.Jo‘rayev (marhum) xodimlarga nisbatan qat’iyatlik bilan yondashib kelgani va Byuro organlari safini nopok xodimlardan tozalagani uchun vaziyat qurboniga aylangan.
Xususan, bo‘limning sobiq xodimi I.Shavkatov bir necha bor intizomiy javobgarlikka tortilgan va u bilan mehnat shartnomasi bekor qilinishida, bo‘lim boshlig‘i B.Jo‘rayevni aybdor deb hisoblab, uning xizmat xonasida o‘zi bilan olib kelgan oshxona pichog‘i bilan og‘ir tan jarohati yetkazgan.
Olingan tan jarohati sababli, B.Jo‘rayev joriy yilning 2-avgust kuni Toshkent shahridagi Respublika shoshilinch tez tibbiy ilmiy yordam markazida vafot etgan.
I.Shavkatovga nisbatan 03.05.2018-yilda O‘zbekiston Respublikasi JKning 25, 97-moddasi 1-qismi (qasddan odam o‘ldirish) bilan jinoyat ishi qo‘zg‘atilgan va sudning 03.10.2018-yildagi hukmi bilan JKning 97-moddasi2-qismi “g” bandi bilan 16 yil muddatga ozodlikdan mahrum qilish jazosi tayinlangan.
Davlat rahbarining joriy yil 28-avgustdagi “O‘zbekiston Respublikasi davlat mustaqilligining yigirma yetti yilligi munosabati bilan huquqni muhofaza qilish organlari, mudofaa va favqulodda vaziyatlar vazirliklari xodimlaridan bir guruhini mukofotlash to‘g‘risida”gi Farmoniga binoan, Bahrom Jo‘rayev (marhum) “Jasorat” medali bilan taqdirlandi.
Byuroning faoliyatiga oid barcha masalalar bo‘yicha qisqa “1107” ishonch telefon raqamlari tun-u kun ishlab kelmoqda, Sh.Ubaydullayev yoki boshqa shaxslar tomonidan yuqoridagi masalalarda murojaat kelib tushmagani ma’lum bo‘ldi.
Izoh (0)