Prezident Shavkat Mirziyoyevning Fransiyaga davlat tashrifi arafasida Parijda “Madaniy meros – O‘zbekiston va Fransiya o‘rtasidagi muloqot ko‘prigi” media-iventi bo‘lib o‘tdi. Bu haqda O‘zA xabar berdi.
O‘zbekiston Elektron ommaviy axborot vositalari milliy assotsiatsiyasi, YUNESKO, mamlakatning Fransiyadagi elchixonasi hamkorligida tashkil etilgan media-iventda O‘zbekistonning madaniy merosi haqida ma’lumot berildi.
O‘zbekiston Oliy Majlisi Senati raisining birinchi o‘rinbosari S.Safoyev, mamlakatning Fransiyadagi Favqulodda va muxtor elchisi S.Rustamboyev, YUNESKO Bosh direktori o‘rinbosari Ernesto Renato Ottone Ramires, O‘zbekistonning YUNESKOdagi doimiy vakili U. Shodiyev va boshqalar O‘zbekiston—Fransiya o‘rtasidagi aloqalar yangi bosqichda rivojlanayotgani, bunda madaniy-gumanitar sohalardagi aloqalar muhim o‘rin tutishini qayd etdi.
Tadbirda O‘zbekistonda amalga oshirilayotgan keng ko‘lamli islohotlar, jumladan, madaniy-ma’rifiy sohalarda samarali xalqaro hamkorlik qilish uchun yaratilayotgan yangi imkoniyatlar haqida hujjatli film namoyish etildi. O‘zbekiston Elektron ommaviy axborot vositalari milliy assotsiatsiyasining “O‘zbekiston madaniy merosi mamlakatlar va xalqlar o‘rtasidagi muloqotga yo‘l” loyihasi doirasida chop etilgan turkum kitoblar namoyish qilindi.
“Madaniy meros – O‘zbekiston va Fransiya o‘rtasidagi muloqot ko‘prigi” mavzusidagi ilmiy seminarda ikki mamlakat taniqli olimlari o‘zaro hamkorlikni yanada mazmunan boyitish, yangi loyihalar ustida ishlash, ilmiy-ma’rifiy almashinuvni faollashtirish istiqbollarini muhokama qildi.
Tadbir doirasida YUNESKOga “O‘zbekiston madaniy merosi mamlakatlar va xalqlar o‘rtasidagi muloqotga yo‘l” loyihasi doirasida nashr etilgan turkum kitoblardan namunalar topshirildi.
Izoh (0)