Amazon asoschisi 24 yil ichida birinchi marta Forbes’ning eng boy amerikaliklar reytingida yetakchilik qildi

Amazon kompaniyasi asoschisi va rahbari Jeff Bezos eng boy amerikaliklar reytingida yetakchilik qildi, deb yozadi Spot Forbes’ga tayanib.

Bezos reytingda 1994-yildan buyon birinchilikni saqlab kelgan Microsoft asoschisi Bill Geytsni siqib chiqardi. Shu bilan bir vaqtda Bezos 2018-yilda dunyodagi eng boy odamga ham aylandi.

Tadbirkor yana bir rekord o‘rnatdi: reyting tarixida birinchi marta uning ishtirokchilaridan birining boyligi 100 milliard dollardan oshdi. Forbes hisob-kitoblariga ko‘ra, Bezosning kapitali bir yil ichida ikki marta ko‘payib, 160 milliard dollarga yetgan.

Elektron tijorat bilan shug‘ullanuvchi Amazon ham muvaffaqiyatli natijalarni ko‘rsatmoqda: kompaniya 1 trillion dollardan ortiq kapitalizatsiya bilan jahonda Apple’dan keyin ikkinchi bo‘ldi. 2018-yilning birinchi yarmida Amazon 100 milliard dollar kirim haqida hisobot berdi (o‘sish o‘tgan yilga nisbatan 41 foiz.)