Amazon асосчиси 24 йил ичида биринчи марта Forbes’нинг энг бой америкаликлар рейтингида етакчилик қилди

Amazon компанияси асосчиси ва раҳбари Жефф Безос энг бой америкаликлар рейтингида етакчилик қилди, деб ёзади Spot Forbes’га таяниб.

Безос рейтингда 1994 йилдан буён биринчиликни сақлаб келган Microsoft асосчиси Билл Гейтсни сиқиб чиқарди. Шу билан бир вақтда Безос 2018 йилда дунёдаги энг бой одамга ҳам айланди.

Тадбиркор яна бир рекорд ўрнатди: рейтинг тарихида биринчи марта унинг иштирокчиларидан бирининг бойлиги 100 миллиард доллардан ошди. Forbes ҳисоб-китобларига кўра, Безоснинг капитали бир йил ичида икки марта кўпайиб, 160 миллиард долларга етган.

Электрон тижорат билан шуғулланувчи Amazon ҳам муваффақиятли натижаларни кўрсатмоқда: компания 1 триллион доллардан ортиқ капитализация билан жаҳонда Apple’дан кейин иккинчи бўлди. 2018 йилнинг биринчи ярмида Amazon 100 миллиард доллар кирим ҳақида ҳисобот берди (ўсиш ўтган йилга нисбатан 41 фоиз.)