O‘zbekiston Bosh prokuraturasi rahbariyati Xalqaro prokurorlar assotsiatsiyasi (XPK) prezidenti G. Yarosh boshchiligidagi delegatsiya bilan uchrashdi, deb yozadi O‘zA.
Uchrashuvda sud-huquq tizimida amalga oshirilayotgan keng ko‘lamli islohotlar, jumladan, prokuratura organlari tizimining tubdan qayta tashkil etilgani haqida ma’lumot berildi.
Yarosh O‘zbekistonda amalga oshirilgan yangilanish va modernizatsiya jarayoniga yuksak baho berar ekan, O‘zbekiston Respublikasi Bosh prokuraturasi bilan hamkorlik o‘rnatishga katta ishonch bildirdi. Uchrashuv davomida u XPAning faoliyati, uning asosiy yo‘nalishlari va vazifalari haqida so‘zlab berdi.
Qayd etilganidek, XPAga 180 davlat a’zo bo‘lib, u dunyoning ko‘p mamlakatlari prokuratura organlari orasida professional aloqalarni o‘rnatish uchun muhim platforma hisoblanadi.
XPA prezidenti o‘zbekistonlik hamkasblarini 2019-yilda Minsk (Belarus) shahrida o‘tkazilishi rejalashtirilgan mintaqaviy konferensiyaga taklif qildi.
Uchrashuv yakunlari bo‘yicha O‘zbekiston XPAga a’zo bo‘lishi uchun tomonlar amalga oshirilishi lozim bo‘lgan davlat ichki taomillarini yo‘lga qo‘yish hamda boshqa a’zo davlatlar prokuraturalari bilan O‘zbekiston uchun manfaatli bo‘lgan aloqalarni o‘rnatishda XPA tomonidan yordam berilishiga oid masalalar haqida og‘zaki kelishib olindi.
Izoh (0)