O‘zbekiston Mudofaa vazirligi harbiy xizmatchilari maxsus bo‘linmalar o‘rtasida o‘tkaziladigan xalqaro musobaqada ishtirok etish uchun 21-sentabr kuni Belarusga jo‘nab ketdi. Bu haqda vazirlik matbuot xizmati “Daryo”ga ma’lum qildi.
Ushbu musobaqada Belarus Davlat xavfsizlik qo‘mitasining “A”, Ichki ishlar vazirligining “Almaz” guruhlari, Belarus prezidentining xavfsizligini ta’minlashga mas’ul xizmat vakillari, shuningdek, xorijlik jamoalar o‘zaro bellashadi.
Musobaqa davomida ishtirokchilar shahar va o‘rmon sharoitida o‘z mahoratlarini jamoaviy hamda yakka tartibda namoyish etishlari lozim. Xususan, otish mashqlarini muvaffaqiyatli bajargan ishtirokchilar, shuningdek, shartli dushman guruhining razvedkachilarini qidirib topish, asirlarni ozod etish, yaradorlarni evakuatsiya qilish kabi shartlarda alohida qo‘shimcha ballar olishi mumkin.
Ishtirokchilar Hamdo‘stlik mamlakatlaridagi maxsus bo‘linmalarda xizmat ko‘rsatuvchi yuqori professionallikka ega hakamlar tomonidan baholab boriladi.
Mazkur musobaqa turli idoralarga qarashli maxsus bo‘linmalar xizmatchilarining nafaqat yuqori tayyorgarlik darajasini, balki jangovar tayyorgarlik bo‘yicha eng so‘nggi va zamonaviy amaliyotdan boxabar bo‘lish imkoniyatini taqdim etadi.
Eslatib o‘tamiz, joriy yilning 28-mart kuni O‘zbekistonga tashrif bilan kelgan Belarus mudofaa vaziri Andrey Ravkov O‘zbekiston Mudofaa vaziri Abdusalom Azizov bilan suhbatda o‘zbekistonlik harbiy xizmatchilarni muntazam o‘tkazib kelinayotgan maxsus qo‘shinlar o‘rtasidagi musobaqalarda ishtirok etishga taklif qilgan edi.
Musobaqada O‘zbekiston Mudofaa vazirligidan 10 nafar vakil mamlakat sharafini himoya qiladi. Bahslarning asosiy qismi 24—28-sentabr kunlari Marina Gorka aholi yashash punktida joylashgan harbiy qism poligonida bo‘lib o‘tadi.
Izoh (0)