Ўзбекистон Мудофаа вазирлиги ҳарбий хизматчилари махсус бўлинмалар ўртасида ўтказиладиган халқаро мусобақада иштирок этиш учун 21 сентябрь куни Беларусга жўнаб кетди. Бу ҳақда вазирлик матбуот хизмати «Дарё»га маълум қилди.
Ушбу мусобақада Беларусь Давлат хавфсизлик қўмитасининг «А», Ички ишлар вазирлигининг «Алмаз» гуруҳлари, Беларусь президентининг хавфсизлигини таъминлашга масъул хизмат вакиллари, шунингдек, хорижлик жамоалар ўзаро беллашади.
Мусобақа давомида иштирокчилар шаҳар ва ўрмон шароитида ўз маҳоратларини жамоавий ҳамда якка тартибда намойиш этишлари лозим. Хусусан, отиш машқларини муваффақиятли бажарган иштирокчилар, шунингдек, шартли душман гуруҳининг разведкачиларини қидириб топиш, асирларни озод этиш, ярадорларни эвакуация қилиш каби шартларда алоҳида қўшимча баллар олиши мумкин.
Иштирокчилар Ҳамдўстлик мамлакатларидаги махсус бўлинмаларда хизмат кўрсатувчи юқори профессионалликка эга ҳакамлар томонидан баҳолаб борилади.
Мазкур мусобақа турли идораларга қарашли махсус бўлинмалар хизматчиларининг нафақат юқори тайёргарлик даражасини, балки жанговар тайёргарлик бўйича энг сўнгги ва замонавий амалиётдан бохабар бўлиш имкониятини тақдим этади.
Эслатиб ўтамиз, жорий йилнинг 28 март куни Ўзбекистонга ташриф билан келган Беларусь мудофаа вазири Андрей Равков Ўзбекистон Мудофаа вазири Абдусалом Азизов билан суҳбатда ўзбекистонлик ҳарбий хизматчиларни мунтазам ўтказиб келинаётган махсус қўшинлар ўртасидаги мусобақаларда иштирок этишга таклиф қилган эди.
Мусобақада Ўзбекистон Мудофаа вазирлигидан 10 нафар вакил мамлакат шарафини ҳимоя қилади. Баҳсларнинг асосий қисми 24—28 сентябрь кунлари Марина Горка аҳоли яшаш пунктида жойлашган ҳарбий қисм полигонида бўлиб ўтади.
Изоҳ (0)