“Toshshahartransxizmat” AJga qarashli avtosaroylarning haydovchi va chiptachilari orasida ishni to‘g‘ri tashkil etish, ularning mas‘uliyatini oshirish, yo‘lovchilarga madaniyatli va sifatli xizmat ko‘rsatish, kasb nufuzini oshirish maqsadida soha xizmatchilariga maxsus kiyim (forma) joriy etish rejalashtirilgan. Bu haqda aksiyadorlik jamiyati matbuot xizmati xabar bermoqda.
“Shu maqsadda ‘Toshshahartransxizmat’ AJ dizaynerlar, rassomlar hamda shunday mahoratga ega bo‘lgan kreativ shaxslar o‘rtasida tanlov e‘lon qiladi.
Ushbu maxsus kiyim (forma)larda zamonaviylik, iqlim va ranglar mutanosibligi, bejirimlilik, betakrorlik, eng asosiysi, yo‘lovchilarga kayfiyat bag‘ishlash jihatlari inobatga olinishi lozim.
Bundan tashqari, umumiy xizmat kiyimi fasllar mavsumiga mos tarzda 2 ta jamlanmadan iborat bo‘lishi shart.Barcha maxsus kiyimga, albatta, ‘Toshshahartransxizmat’ AJ belgisi tushirilishi kerak.Haydovchilarga cho‘ntakli va tugmali, bayram kunlari uchun esa oq rangli ko‘ylak bo‘lishi kerak. Shim bichimida manjetsiz, klassika nazarda tutilishi lozim. Formada bosh kiyim ham bo‘lishi shart.
Chiptachilar uchun haydovchilardan farqli o‘laroq bichim tanlanishi kerak.Kuz-qish mavsumi uchun keng yoqali, uzun yengli, beli bo‘g‘mali libos yaratilishi nazarda tutilgan. Ayollar uchun mo‘ljallangan yubka tizzadan 5-10 santimetr tushib turishi kerak (agar yubka tanlansa yoki erkaklardan farqli ravishda shim bo‘lishi ham mumkin)”, — deyiladi xabarda.
Takliflar 17—27-sentabr kunlari info@tshtx.uz elektron pochtasi orqali qabul qilinadi. Tanlov g‘olibi qimmatbaho sovg‘a bilan taqdirlanadi.
Izoh (0)