Joriy yilning 20-sentabr kuni Belarus Respublikasi Adliya vazirining o‘rinbosari Igor Tushinskiy boshchiligidagi delegatsiya Namangan shahridagi Davlat xizmatlari markazining tajribasini o‘rganish uchun tashrif buyurdi. Bu haqda markaz xabar berdi.
Delegatsiyani Namangan viloyati Davlat xizmatlari boshqarmasi boshlig‘i Dilmurod Ismoilov kutib oldi. Davlat xizmatlari agentligi direktori o‘rinbosari No‘mon Muhammadiyev bilan birgalikda mehmonlarni davlat xizmatlari ko‘rsatishning milliy tizimi, Namagan misolida markazlarning faoliyati bilan tanishtirdi. Mazkur markaz zarur bo‘lgan zamonaviy uskunalar bilan jihozlangan eng katta va namunalilardan biri.
D. Ismoilov “yagona darcha” tamoyilini amalga oshirish, shuningdek, markazlarda davlat xizmatlarini ko‘rsatish sohasidagi afzalliklar haqida so‘zlab berdi. Delegatlarga elektron navbat tizimini, ba’zi davlat xizmatlarini olish jarayonini taqdim etishdi. Markazga tashrif buyuruvchilar qulayligi uchun o‘zidayoq joylashgan bolalar o‘yin maydonchasi hamda kafega ekskursiya o‘tkazishdi.
Shuningdek, “mobil” sayyor xizmatlari ko‘rsatish haqida ma’lumot berildi. Maxsus texnika bilan jihozlangan avtobus va Damas avtomobillarini taqdim etishdi.
Tadbir yakunida Belarus Respublikalik mehmonlar samimiy qabul uchun minnatdorchilik izhor etdi hamda davlat xizmatlarini tashkil etish va takomillashtirish bo‘yicha mamlakatda olib borilayotgan ishlarni qo‘llab-qo‘vvatladi.
Eslatib o‘tamiz, bugungi kunda Namangan Davlat xizmatlari markazi eksperimentar markazlardan biri bo‘lib, 100 ga yaqin davlat xizmatlarini ko‘rsatadi. Bu markaz Namangan shahrining aholisiga pasport beradigan va yangilaydigan yagona markazdir. Bu yerda bir kunda 800 dan ziyod fuqaroga xizmat ko‘rsatiladi. Markaz binosida Prezident Xalq qabulxonasi, FHDYo bo‘linmasi, sug‘urta, kadastr, haydovchilik guvohnomasini almashtirish, tez yordam va bank filiallari mavjud.
Izoh (0)