Bekobodlik maktab o‘quvchisi nega do‘stiga pichoq urdi? (video)

“Yoshlar” teleradiokanali muxbiri Bekoboddagi maktab o‘quvchisining do‘stiga pichoq bilan shikast yetkazgani bilan bog‘liq voqeaga oydinlik kiritdi.

Bekobod shahridagi 6-sonli o‘rta maktab o‘quvchilari Tohir Bozorov va Otabek Meliyev o‘rtasida nizo kelib chiqadi va bu bir necha oy davom yetadi. Orada katta-kichik janjallar bo‘lib turadi. Joriy yil sentyabr oyi boshida esa bu tarafdorlarning guruh janjaliga aylanib ketadi. Bekobod shahar Me’mor ko‘chasidagi to‘yxona orqasiga navbatdagi janjalda ikki “qahramon” dahanaki urishadi. Otabek Meliyevning o‘rtog‘i Islom Shokirjonov janjalga aralashadi. Shu payt Tohir yonidagi pichoqni Islomning yelka qismiga sanchadi.

— Pichoqni chiqarib qo‘rqitdim, qochinglar deb. Keyin ular bostirib keldi. O‘zim bilmagan holatda majbur bo‘lib tiqdim, – deydi Tohir Bozorov.

—Biznes yo‘nalishi bo‘yicha xorij universitetiga kirgan, shu oyda ketishim kerak edi, bunday muammo bo‘ldi. Lekin xudoga shukr qilaman, ota-onam, uydagilarning baxtiga tirik qoldim. Bu menga butun umrga dars bo‘ldi. Endi hech qachon bunday ishlarga qo‘shilayman,—deydi jabrlanuvchi Islom Shokirjonov.

“Pichoqni nega olib yurardingiz”, degan savolga esa, Tohir “dalada ishlatardim, uyga tashlab chiqish esimdan chiqibdi”, deb javob berdi.

Hozirda mazkur jinoyat ishi bo‘yicha dastlabki tergov harakatlari olib borilmoqda.