«Ёшлар» телерадиоканали мухбири Бекободдаги мактаб ўқувчисининг дўстига пичоқ билан шикаст етказгани билан боғлиқ воқеага ойдинлик киритди.
Бекобод шаҳридаги 6-сонли ўрта мактаб ўқувчилари Тоҳир Бозоров ва Отабек Мелиев ўртасида низо келиб чиқади ва бу бир неча ой давом етади. Орада катта-кичик жанжаллар бўлиб туради. Жорий йил сентябр ойи бошида эса бу тарафдорларнинг гуруҳ жанжалига айланиб кетади. Бекобод шаҳар Меъмор кўчасидаги тўйхона орқасига навбатдаги жанжалда икки «қаҳрамон» даҳанаки уришади. Отабек Мелиевнинг ўртоғи Ислом Шокиржонов жанжалга аралашади. Шу пайт Тоҳир ёнидаги пичоқни Исломнинг елка қисмига санчади.
— Пичоқни чиқариб қўрқитдим, қочинглар деб. Кейин улар бостириб келди. Ўзим билмаган ҳолатда мажбур бўлиб тиқдим, – дейди Тоҳир Бозоров.
—Бизнес йўналиши бўйича хориж университетига кирган, шу ойда кетишим керак эди, бундай муаммо бўлди. Лекин худога шукр қиламан, ота-онам, уйдагиларнинг бахтига тирик қолдим. Бу менга бутун умрга дарс бўлди. Энди ҳеч қачон бундай ишларга қўшилайман,—дейди жабрланувчи Ислом Шокиржонов.
«Пичоқни нега олиб юрардингиз», деган саволга эса, Тоҳир «далада ишлатардим, уйга ташлаб чиқиш эсимдан чиқибди», деб жавоб берди.
Ҳозирда мазкур жиноят иши бўйича дастлабки тергов ҳаракатлари олиб борилмоқда.
Изоҳ (0)