Rossiya O‘zbekistonga 32 yoshli Suxrob Fozilovni ekstraditsiya qildi, u respublika huquq-tartibot organlari tomonidan 2010-yildan buyon qidirilayotgan edi, deb yozadi “Podrobno.uz”.
Erkak O‘zbekiston Jinoyat kodeksining 242 (jinoiy uyushma tashkil etish), 168 (firibgarlik), 243-modda (jinoiy faoliyatdan olingan daromadlarni legallashtirish)larida nazarda tutilgan jinoyatlarni amalga oshirganlikda ayblanmoqda.
Fozilov 2007—2009-yillarda O‘zbekiston hududida offshor zonalarda ro‘yxatdan o‘tkazilgan, moliyaviy piramida ko‘rinishidagi chet el kompaniyalari vakillari homiyligi ostida yaratilgan jinoiy faoliyatni tashkil qilgan va uning bo‘linmalariga rahbarlik qilgan.
2008—2009-yillarda aldov va ishonchni suiiste’mol qilish yo‘li bilan Samarqand viloyati hududida yashovchi 140 fuqaroning jami 61 ming dollar mablag‘larini o‘g‘irlagan va chet el kompaniyasi hisobiga o‘tkazgan. Shuningdek, jinoiy hamjamiyatning boshqa bo‘linmalari rahbarlari bilan birgalikda 13 million dollardan ortiq “orttirilgan” daromadlarni legallashtirgan.
2017-yil noyabrida davlatlararo qidiruvdagi Fozilov Moskva metropolitenida huquq-tartibot organlari xodimlari tomonidan qo‘lga olingan.
Izoh (0)