“O‘zbekkonsert” davlat muassasasi qoshidagi qo‘shiqlar va ularga ishlangan videokliplar saviyasini baholash badiiy kengashining navbatdagi yig‘ilishi bo‘lib o‘tdi. Kengashda 18 nafar xonanda tomonidan taqdim etilgan videokliplar ko‘rib chiqildi. Bu haqda “O‘zbekkonsert” davlat muassasasi matbuot xizmati ma’lum qildi.
“O‘zbekkonsert” badiiy kengashida olti nafar xonandaning video kliplari turli xil kamchiliklar sabab, efirga uzatishga ruxsat berilmadi.
Badiiy kengash tomonidan “Nihol” mukofoti sovrindori Manzura Yuldasheva ijro etgan “Adashdim” qo‘shig‘ining klipdagi ayrim tasvirlarni to‘g‘rilash kerakligi tushuntirilib, ushbu klipni efirga uzatish rad etildi. Kamchiliklarni bartaraf etgandan so‘ng qayta topshirish mumkinligi tavsiya etildi.
Xonanda Bahriddin Zuhriddinov ijro etgan “Dilozorim” qo‘shig‘iga ishlangan video klip mazmuni bilan qo‘shiq mazmunida uyg‘unlik yo‘qligi, klipdagi oxirgi qismidagi dialoglar qo‘shiqqa mos emasligi ta’kidlanib, rad etildi. Ko‘rsatilgan kamchiliklarni bartaraf etilganidan so‘ng, kengashga qayta taqdim etilishi ta’kidlandi.
Xonanda Samadjon Ro‘zmetov ijro etgan “Kel ey” qo‘shig‘iga ishlangan videoklip mazmuni bilan qo‘shiq mazmunida uyg‘unlik yo‘qligi, klipdagi dialoglar tushunarsizligi hamda qo‘shiq matni sayozligi bois rad etildi.
Xonanda Alisher Zokirov ijro etgan “Yurak sen bilan” qo‘shig‘iga ishlangan video klipdagi o‘rinsiz kadrlardan voz kechish kerakligi xonandaga tushuntirildi. Ko‘rsatilgan kamchiliklarni bartaraf etib kengashga qayta taqdim etilishi ta’kidlandi.
Xonanda Nargiza Kenjayeva ijro etgan “Bale-bale” qo‘shig‘iga ishlangan videoklipda g‘arbga taqlid kuchli ekanligi, milliylikdan uzoq, qadriyatlarimizga mutlaqo zid tasvirlar mavjudligi ta’kidlanib, ushbu video klip ham rad etildi.
Otabek Mutalxo‘jayev ijro etgan “Ayt tun” qo‘shig‘i matnini professional shoirga ko‘rsatib qayta ijro etishini hamda klipdagi tasvirlaridagi kamchiliklar xonanda va klipmeykerga tushuntirildi. Ko‘rsatilgan kamchiliklarni bartaraf etib kengashga qayta taqdim etilishi ta’kidlandi.
Izoh (0)