«Ўзбекконцерт» давлат муассасаси қошидаги қўшиқлар ва уларга ишланган видеоклиплар савиясини баҳолаш бадиий кенгашининг навбатдаги йиғилиши бўлиб ўтди. Кенгашда 18 нафар хонанда томонидан тақдим этилган видеоклиплар кўриб чиқилди. Бу ҳақда «Ўзбекконцерт» давлат муассасаси матбуот хизмати маълум қилди.
«Ўзбекконцерт» бадиий кенгашида олти нафар хонанданинг видео клиплари турли хил камчиликлар сабаб, эфирга узатишга рухсат берилмади.
Бадиий кенгаш томонидан «Ниҳол» мукофоти совриндори Манзура Юлдашева ижро этган «Адашдим» қўшиғининг клипдаги айрим тасвирларни тўғрилаш кераклиги тушунтирилиб, ушбу клипни эфирга узатиш рад этилди. Камчиликларни бартараф этгандан сўнг қайта топшириш мумкинлиги тавсия этилди.
Хонанда Баҳриддин Зуҳриддинов ижро этган «Дилозорим» қўшиғига ишланган видео клип мазмуни билан қўшиқ мазмунида уйғунлик йўқлиги, клипдаги охирги қисмидаги диалоглар қўшиққа мос эмаслиги таъкидланиб, рад этилди. Кўрсатилган камчиликларни бартараф этилганидан сўнг, кенгашга қайта тақдим этилиши таъкидланди.
Хонанда Самаджон Рўзметов ижро этган «Кел эй» қўшиғига ишланган видеоклип мазмуни билан қўшиқ мазмунида уйғунлик йўқлиги, клипдаги диалоглар тушунарсизлиги ҳамда қўшиқ матни саёзлиги боис рад этилди.
Хонанда Алишер Зокиров ижро этган «Юрак сен билан» қўшиғига ишланган видео клипдаги ўринсиз кадрлардан воз кечиш кераклиги хонандага тушунтирилди. Кўрсатилган камчиликларни бартараф этиб кенгашга қайта тақдим этилиши таъкидланди.
Хонанда Наргиза Кенжаева ижро этган «Бале-бале» қўшиғига ишланган видеоклипда ғарбга тақлид кучли эканлиги, миллийликдан узоқ, қадриятларимизга мутлақо зид тасвирлар мавжудлиги таъкидланиб, ушбу видео клип ҳам рад этилди.
Отабек Муталхўжаев ижро этган «Айт тун» қўшиғи матнини профессионал шоирга кўрсатиб қайта ижро этишини ҳамда клипдаги тасвирларидаги камчиликлар хонанда ва клипмейкерга тушунтирилди. Кўрсатилган камчиликларни бартараф этиб кенгашга қайта тақдим этилиши таъкидланди.
Изоҳ (0)