AQSHda giyohvand moddalar sotgani uchun 11 yillik qamoq jazosini o‘tayotgan Preston Torp qamoqxona kamerasidan turib venchur startapining shtatdagi dasturchisiga aylandi. Bu haqda TechCrunch xabar bermoqda.
Ma’lum qilinishicha, Torp olti oy davomida AQSHning Turso kompaniyasi boshqarayotgan ochiq kodli loyihada qatnashgan. Uning texnik bilim darajasi shunchalik yuqori ediki, Glauber Kosta bosh direktori unga ish taklif qilgan. Aynan shu paytda u Torpning qamoqda ekanligini bilib qolgan. Shunday bo‘lsa-da, may oyidan boshlab u San-Fransiskodagi venchur kapitali bilan moliyalashtiriladigan startapda kamerasidan to‘liq ish kuni davomida ishlamoqda.
“Men yanvar oyida u bilan aloqaga chiqdim, shunchaki uni yaxshiroq tushunish va tanishish maqsadida. O‘shandan beri biz uning hayotidagi o‘zgarishlarni uzoq va batafsil muhokama qildik, bu o‘zgarishlar uni hozirgi holatiga olib keldi... Uning hayot yo‘lini bilib, shaxsan unga bo‘lgan hurmatimiz yanada ortdi”, deydi Clauber Kosta.
Biroq Turso Torp hamkorlik qilgan birinchi kompaniya emas, u ilgari Unlocked Labs’da ishlagan va qamoqxonalar uchun ta’lim dasturiy ta’minotini ishlab chiqqan. Bu Men shtatining mahbuslarga masofadan turib ishlash imkonini beruvchi tajribaviy dasturi tufayli amalga oshgan.
Torp qamoqdaligidayoq dasturlash bilan shug‘ullana boshlagan. Men shtatidagi Mountain View qamoqxonasiga o‘tkazilgach va pandemiya boshlanishi bilan, unga onlayn ta’lim olishga ruxsat berilgan. Shundan so‘ng u universitetga o‘qishga kirgan. Vaziyatning o‘zgarishi, uning aytishicha, unga yangi imkoniyat va hamma narsa yo‘qolmaganlik hissini bergan.
Ta’kidlanishicha, Men shtatida 30 dan ortiq mahbus “xizmat ko‘rsatgan mehnat bloki” deb ataladigan, yaxshi xulq-atvorli mahbuslar uchun mo‘ljallangan nisbatan erkin sektorda yashaydi va ishlaydi. Bunday mahbuslar ish haqining 10 foizini shtat foydasiga o‘tkazadi, shuningdek, agar qarzlari bo‘lsa, ularni to‘laydi (alimentlar, sud xarajatlari va boshqalar).
Men shtati axloq tuzatish muassasalari departamenti ma’lumotlariga ko‘ra, shtatdagi qayta jinoyat sodir etish darajasi AQSHdagi eng past ko‘rsatkichlardan biri hisoblanadi. Takroran jinoyat sodir etishning umumiy ulushi erkaklar orasida 21-23 foizni, ayollar orasida esa atigi 9 foizni tashkil etadi. Qamoq muddatini o‘tayotganda kollejda ta’lim olganlar orasida takroriy jinoyatlar darajasi deyarli nolga teng. Qayta jinoyatlar kamayishidan tashqari, shtat qamoqxonalarida zo‘ravonlik sezilarli darajada kamaygan.
Izoh (0)