Joriy yilda Samarqand shahridan Saudiya Arabistonida Haj ibodatlarini ado etish uchun ketgan hojilarning 49 nafari muqaddas qadamjodan o‘z yurtiga qaytib kelishdi. Bu haqida “Daryo” muxbiri Farhod Norbo‘tayev xabar bermoqda.
Muborak Haj safaridan qaytgan hojilarimizni Samarqand xalqaro aeroportida Samarqand viloyati hokimi o‘rinbosari Shuhrat Qulmatov, Samarqand shahar hokimi Furqat Raximov va viloyat bosh imom-xatibi Zayniddin Eshonqulov kutib oldi.
Duolar qabul bo‘ladigan maskanlarda qilingan duolar mustajob bo‘ladi. Ana shu fursatlarni g‘animat ekanini anglagan ziyoratchilarimiz ko‘zlarida yosh, chin ixlos ila duolar qilishib, yurtimizga qaytib kelishdi.
— Muqaddas Haj ziyoratiga borishdek baxtga muyassar bo‘lganimdan Allohga shukurlar aytaman, — deydi Samarqand shahridagi Abdulla Qahhor MFYda yashovchi Hamroqul bobo Isanqulov. – Haj ziyoratiga borish bir vaqtlar biz uchun ushalmas orzu edi. Mustaqilligimiz sharofati bilan bugun orzularimizning ro‘yobini ko‘rayapmiz. Bularning barchasi yurtimizda hukm surayotgan tinchlik va osoyishtalik, muhtaram Prezidentimizning bevosita g‘amxo‘rligi tufayli ekanligini yaxshi bilamiz. Mamlakatimiz yildan-yilga rivojlanib, hayotimiz tobora farovonlashib borayotganidan mamnunmiz. Yurtimiz tinch, kelajagimiz bundan-da yorug‘ bo‘lsin!
Joriy yilda Samarqand shahridan 65 nafar fuqaro Haj safariga borgan. Viloyat bo‘yicha 450 kishi Haj safariga ketgan bo‘lib, shu kungacha 230 nafar hojilar ziyoratdan qaytib kelishgan. Qolgan 220 nafar hojilar 9-sentabr kuni qaytadi.
Izoh (0)