Жорий йилда Самарқанд шаҳридан Саудия Арабистонида Ҳаж ибодатларини адо этиш учун кетган ҳожиларнинг 49 нафари муқаддас қадамжодан ўз юртига қайтиб келишди. Бу ҳақида «Дарё» мухбири Фарҳод Норбўтаев хабар бермоқда.
Муборак Ҳаж сафаридан қайтган ҳожиларимизни Самарқанд халқаро аэропортида Самарқанд вилояти ҳокими ўринбосари Шуҳрат Қулматов, Самарқанд шаҳар ҳокими Фурқат Рахимов ва вилоят бош имом-хатиби Зайниддин Эшонқулов кутиб олди.
Дуолар қабул бўладиган масканларда қилинган дуолар мустажоб бўлади. Ана шу фурсатларни ғанимат эканини англаган зиёратчиларимиз кўзларида ёш, чин ихлос ила дуолар қилишиб, юртимизга қайтиб келишди.
— Муқаддас Ҳаж зиёратига боришдек бахтга муяссар бўлганимдан Аллоҳга шукурлар айтаман, — дейди Самарқанд шаҳридаги Абдулла Қаҳҳор МФЙда яшовчи Ҳамроқул бобо Исанқулов. – Ҳаж зиёратига бориш бир вақтлар биз учун ушалмас орзу эди. Мустақиллигимиз шарофати билан бугун орзуларимизнинг рўёбини кўраяпмиз. Буларнинг барчаси юртимизда ҳукм сураётган тинчлик ва осойишталик, муҳтарам Президентимизнинг бевосита ғамхўрлиги туфайли эканлигини яхши биламиз. Мамлакатимиз йилдан йилга ривожланиб, ҳаётимиз тобора фаровонлашиб бораётганидан мамнунмиз. Юртимиз тинч, келажагимиз бундан-да ёруғ бўлсин!
Жорий йилда Самарқанд шаҳридан 65 нафар фуқаро Ҳаж сафарига борган. Вилоят бўйича 450 киши Ҳаж сафарига кетган бўлиб, шу кунгача 230 нафар ҳожилар зиёратдан қайтиб келишган. Қолган 220 нафар ҳожилар 9 сентябрь куни қайтади.
Изоҳ (0)