Mamlakatimiz mustaqilligining 27 yilligi munosabati bilan Samarqand viloyat ichki ishlar boshqarmasi Tezkor vazifalarni bajaruvchi maxsus otryadi hamda viloyat sog‘liqni saqlash boshqarmasi hamkorligida Urgut tumanida joylashgan “Urgut muruvvat va nogironlar uchun internat uyi”da bayram tadbiri bo‘lib o‘tdi. Bu haqida “Daryo” muxbiri Farhod Norbo‘tayev xabar bermoqda.
Bugungi kunda 445 nafar 1 va 2 guruh vasiylikka olingan va ruhiy kasallikka chalingan nogironligi bo‘lganlar davolanayotgan ushbu maskandagi bayram kechasi internat uyi davolanuvchilari uchun haqiqiy shodiyonaga aylandi.
Tadbirda so‘zga chiqqanlar bu yerda davolanuvchi insonlarni bayram bilan tabriklab, ularning ko‘nglini ko‘tarishdi. Shuningdek, to‘shakka mixlanib qolgan nogironlarning ham xolidan xabar olinib, ularga bayramona taomlar ulashildi.
— Ulug‘ ayyom kunlarida ko‘ngli yarim insonlar holidan xabar olishdek xayrli va savobli ish bo‘lmasa kerak. Bugun ular bayramona kayfiyatda, bir piyola choy ustida suhbat qurib, xursandchiligidan raqsga ham tushishdi, -deydi viloyat IIB matbuot xizmati rahbari Shirin Normurodova.
— Qolaversa, bunday bayram tadbirlari hamyurtlarimizni ona Vatanga bo‘lgan sadoqati, ota-ona, qarindosh-urug‘larga bo‘lgan mehrini yana bir bor namoyon etib, ularning qalbida ezgu xislatlarni oshiradi.
Bayram munosabati bilan Samarqand shahar IIO FMB 3-son IIB xodimlari Payariq tumani Javxar ota MFY Yettiurug‘ qishlog‘ida istiqomat qiluvchi, serebral falajiga chalingan Hasan va Husan Toshpo‘latovlarning ham holidan xabar olishdi.
Ayni paytda 11 yoshni qarshilagan Hasan va Husan sog‘ayib ketishlari uchun saxovatpesha hamyurtlarimizning ko‘magiga muhtoj ekanligi OAVda bayon etilgan edi. IIB xodimlari ijtimoiy ko‘makka muhtoj bo‘lgan oilaga 4 million so‘m pul va yangi o‘quv yiliga kitoblar sovg‘a qilindi.
Izoh (0)