Oʻzbekiston maktablarida korporativ boshqaruv tizimi joriy etiladi. Bu haqda Xalqaro press-klub sessiyasida Xalq taʼlimi vaziri Sherzod Shermatov maʼlum qildi, deya xabar beradi Sputnik.
“Bizning boshqaruv tizimimiz shu vaqtgacha oʻta markazlashgan boʻlgan. Bugungi kunda biz tizimni markazlashishdan toʻliq chiqarish va ota-onalarni maktabni boshqarishga jalb qilish boʻyicha ishlarni olib bormoqdamiz”, — dedi Shermatov.
Vazirga koʻra, Oʻzbekistonning har bir maktabida ota-onalar qoʻmitasi vakillaridan iborat kuzatuv kengashi tashkil etiladi. Ular toʻlaligicha maktab faoliyatiga jalb etilishi va maktabdagi jarayonni boshqarishi lozim. Bu kengash aʼzolariga maktab direktorini saylash huquqi ham beriladi. Maktab rahbarlari esa kuzatuv kengashi oldida hisobot beradi.
Shuningdek, kuzatuv kengashi maktabning moliyaviy holati toʻgʻrisida toʻliq maʼlumotga ega boʻladi. Byudjetdan qancha mablagʻ ajratilgani, bu mablagʻlar qaysi yoʻnalishda sarf etilayotgani masalalari shular jumlasidandir.
Kengash aʼzolari maktabdan tashqari qanday yoʻnalishlar ochilishi lozimligini hal etadi, oshxonalar ijarasiga tariflar oʻrnatish huquqiga ega boʻladi va maktabning rivojlanishiga toʻsqinlik qilayotgan muammolarni aniqlaydi.
Izoh (0)