Oʻzbekistondan soliqlardan qochishning keng foydalanilayotgan yana bir usuli aniqlandi. Bu haqda Davlat soliq qoʻmitasi maʼlum qildi, deya xabar beradi “Xalq soʻzi”.
Soliq kodeksining 22-moddasiga muvofiq, dividendlar yuridik shaxs tomonidan uning muassislari oʻrtasida taqsimlanadigan sof foydaning yoki oʻtgan yillardagi taqsimlanmagan foydaning bir qismi hisoblanadi.
Aniqlanishicha, 2015—2017-yillarda 1223 ta korxona taqsimlanadigan sof foydasi boʻlmasa-da, 270,1 mlrd soʻmlik mablagʻlarini dividend koʻrinishida hisob raqamlaridan noqonuniy toʻlab bergan. Buning oqibatida davlat byudjetiga 36 milliard soʻm soliq tushmagan.
Foydasi yoʻq yoki zarar bilan ishlayotgan yuridik shaxsning dividend deb toʻlab bergan mablagʻi jismoniy shaxslarga moddiy naf deb baholanib, jismoniy shaxslarning daromad soligʻi stavkasida, agar yuridik shaxslarga toʻlangan boʻlsa, ularning boshqa daromadlari tarkibiga kiritilib, soliqqa tortilishi shart edi.
Masalan, xususiy korxona egasi foydasi yoʻq yoki balansida zarar boʻlgani holda 50 million soʻm mablagʻini dividend toʻlovi deb 10 foiz stavkada soliq toʻlab hisob raqamidan olgan boʻlsa, Soliq kodeksi talabida 22,5 foiz stavkada 11,2 million soʻm soliq toʻlashi lozim edi.
Xoʻjalik subyektlarining moliyaviy hisobotlariga tayanib, soliq organlari Soliq kodeksining 38-moddasi asosida oxirgi 5 yilda toʻlangan dividend toʻlovlarini soliqqa tortilishini kameral nazoratdan oʻtkazmoqda.
Soliq toʻlovchilar Soliq kodeksining 31-moddasi talabida soliqlarni hisoblab chiqarish va toʻlashda yoʻl qoʻygan xatolarini mustaqil ravishda tuzatish huquqiga ega.
Maʼlumot uchun, Prezidentning 2018-yil 29-iyundagi farmoni bilan 2019- yil 1-yanvardan boshlab dividend soligʻi stavkasi ikki marotabaga kamaytirilib, 10 foizdan 5 foizga tushirilgan.
Izoh (0)