Oʻzbekiston yoshlar ittifoqi Markaziy kengashida “Yoshlar – kelajagimiz” jamgʻarmasi va Xalq banki, “Ipak yoʻli” banki, Milliy bank hamda “Hamkorbank” oʻrtasida bosh kelishuv imzolandi. Shundan soʻng jamgʻarma faoliyati yuzasidan matbuot anjumani boʻlib oʻtdi.
Unda Bosh prokuratura, Bandlik va mehnat munosabatlari vazirligi, OAV vakillari, tadbirkorlar va yoshlar qatnashdi.
Tadbirda jamgʻarma ijro etuvchi direktori Bunyodbek Bahrombekov yoshlarning biznes tashabbuslari, startap, gʻoya va loyihalarini qoʻllab-quvvatlash, ishsiz yoshlarni mutaxassislik va biznes yuritish koʻnikmalari boʻyicha oʻqitishga doir amalga oshirilgan chora-tadbir va islohotlar yuzasidan batafsil maʼlumot berib, shtab faoliyatini sarhisob qildi.
Unga koʻra, barcha tuman va shaharlar mahallalari kesimida 4861 ta kichik guruh tuzilgan. Uyma-uy yurilib, yoshlar bilan soʻrovlar oʻtkazish, ularning muammo va qiziqishlarini oʻrganish, hududga “tashxis” qoʻyish ishlari olib borildi.
Oʻrganishlar mobaynida respublika boʻyicha 823 489 nafar ishsiz yosh aniqlandi. Ularning 574 032 nafari bandlik masalasida murojaat qilgan, 400 867 nafari tadbirkorlik faoliyatini boshlash uchun kredit, 67 459 nafari biznes loyihalarini yoʻlga qoʻyish uchun joy masalasida koʻmak soʻragan. 209 544 nafar yosh kasb-hunar oʻrganish, bepul kurslarda oʻqish istagini bildirdi.
Mavjud muammolarning ijobiy hal etilishida Toshkent viloyati, Quyi Chirchiq tumani va Toshkent shahri, Chilonzor tumanidagi tajribalarga tayanildi.
Jumladan, tadbirkorlik sohasiga kirib kelayotgan 13 261 nafar yosh mazkur soha bilan yaqindan tanishtirilib, biznes-rejalar tuzib berildi. 27 381 nafari ish bilan taʼminlandi. 6893 nafar yoshlar kasb-hunar oʻrganmoqda.
53 975 nafar voyaga yetmaganlar va yoshlar turli yoʻnalishdagi toʻgaraklarga jalb etildi. Shuningdek, 3696 nafar yoshlar tadbirkor sifatida roʻyxatdan oʻtkazildi. Bundan tashqari, 146 nafar yosh faoliyat koʻrsatish uchun bino bilan taʼminlanib, 3032 nafari kasanachilikka jalb etildi.
Markaziy bank boshqarma boshligʻi Komil Ahmedov “Yoshlar – kelajagimiz” jamgʻarmasi mablagʻlaridan imtiyozli kreditlar ajratish va lizing ximzatlarini koʻrsatish hamda tijorat banklari kreditlari boʻyicha kafilliklar berish tartibiga alohida toʻxtaldi.
Muloqot davomida ishsiz yoshlarni kasblar va mutaxassisliklarga professional oʻqitish yuzasidan hamda qisqa muddatli kurslar sonini koʻpaytirish va sifatini oshirish boʻyicha amalga oshirilayotgan chora-tadbirlar toʻgʻrisida fikr bildirildi.
Anjuman soʻngida ishtirokchilar spikerlarga oʻz savollari, taklif-tavsiyalarini berdi. Uchrashuvda “Yoshlar – kelajagimiz” jamgʻarmasi logotipi uchun tanlov ham eʼlon qilindi.
Izoh (0)