Qoraqalpog‘istonda 150 nafar ishsiz fuqaro jamoat ishlariga jalb etildi

Joriy yil 16-avgust kuni Qoraqalpog‘iston Respublikasi Qo‘ng‘irot tumani “Qoraqalpog‘iston” PFY (posyolka fuqarolar yig‘ini) aholisining ijtimoiy-iqtisodiy holatini o‘rganish hamda mavjud muammolar va kamchiliklarni bartaraf etish yuzasidan Qoraqalpog‘iston Respublikasi Jo‘qorg‘i Kengesi Raisi M.T.Yerniyazov raisligida yig‘ilish bo‘lib o‘tgan edi. Bu haqda “Daryo”ga Qoraqalpog‘iston Respublikasi Vazirlar Kengashi axborot xizmati xabar berdi.

Mazkur uchrashuvda aholi tomonidan bildirilgan taklif va murojaatlar har tomonloma inobatga olinib, hududda, umuman Qo‘ng‘irot tumanida uyma-uy yurib aholi muammolarini va mavjud kamchiliklarni o‘rganish bo‘yicha ishchi guruhlar tuzuldi.

Ushbu ishchi guruhlar ayni paytgacha “Jasliq” posyolkasi va Qo‘ng‘irot tumanida aholini ijtimoiy-iqtisodiy rivojlantirish bo‘yicha o‘rganishlar olib bordi va mazkur tadbirlar davom etmoqda.

“Qoraqalpog‘iston” posyolkasida tashkil etilgan aholi bilan uchrashuv davomida aholi murojaatlaridan kelib chiqib, Qoraqalpog‘iston Respublikasi Qo‘ng‘irot tumani aholisining ijtimoiy-iqtisodiy sharoitini yaxshilash, jumladan, mahalliy aholi bandligini ta’minlash bo‘yicha tumanda Respublika ishchi guruhi tomonidan monitoring ishlarini olib borildi.

Belgilangan o‘rganishlar natijalari bo‘yicha Respublika Ishchi guruhi, Qo‘ng‘irot tuman hokimligi tomonidan muammolar bazasi to‘planib, ularning yechimi yuzasidan sektorlar rahbarlari, mas’ul vazirlik va idoralar rahbarlari zimmasiga quyidagicha vazifalar yuklatildi.

Hududdagi belgilangan ko‘p qavatli uylarni va 2 ta maktabgacha ta’lim muassasasini qisqa fursatda ta’mirlash ishlarini yakunlash, hududdagi qishloq vrachlik punkti shtat birligini 5 taga ko‘paytirish, posyolka hududida 150 kishilik “Madaniyat saroyi”, namunaviy arzon uy-joylar hamda molxona qurish, shuningdek, Bandlik va mehnat munosabatlari vazirligi “Mahalla” hayriya jamoat fondi bilan birgalikda “Qoraqalpogʻiston” posyolkasida 100 ta va “Jasliq” posyolkasida 50 tadan kam bo‘lmagan ishsiz fuqarolarni jamoat ishlariga jalb qilish kabi vazifalar shular jumlasidandir.