Andijon viloyatidagi tuman va shaharlar markaziy bozorlari, 30 dan ziyod savdo majmuasi, bir qator mahalla guzarlari hamda 67 ta umumta’lim maktabida “Maktab yarmarkasi” tashkil etilib, aholiga xizmat koʻrsatmoqda. Bu haqda O‘zA xabar berdi.
Yarmarkalarda yigirmadan ziyod savdo tashkilotlari tomonidan sifatli oʻquv va kanselariya qurollari, oʻquvchilar liboslari, sumkalari sotuvi yoʻlga qoʻyilgan.
“Ikki yuzga yaqin turdagi mahsulotlar, oʻquv qurollarini savdoga chiqarganmiz, — deydi “Sharq ziyokori” MChJ Andijon filiali rahbari Ulugʻbek Isʻhoqov. — Aholiga qulaylik yaratish maqsadida plastik karta orqali ham savdo qilinmoqda. Narxlar bozordagidan nisbatan arzon, eng asosiysi, mahsulotlarimiz sifatlidir”.
10-sentabrga qadar davom etadigan mazkur yarmarkalar ota-onalarga katta qulaylik yaratmoqda.
“Farzandlarimga oʻquv qurollari, sumkalar sotib oldik, — deydi Andijon shahridagi 7-umumta’lim maktabi boshlangʻich sinf oʻqituvchisi Gavharoy Gʻulomjonova. — Ularni oʻzimiz istiqomat qilayotgan Boʻston mahallasi guzarida tashkil etilgan Maktab yarmarkasidan xarid qilish men uchun ancha qulay boʻldi, ortiqcha ovoragarchilik boʻlmadi. Narxning bozordagiga nisbatan arzon va sifatli ekanligi menga manzur boʻldi”.
Izoh (0)