Mudofaa vazirligi harbiy xizmatchilari Qurbon hayiti munosabati bilan Qariyalar uylarida yashayotgan nuroniylar hamda Mehribonlik uylarida tarbiyalanayotgan bolajonlar holidan xabar oldi. Bu haqda vazirlik matbuot xizmati “Daryo”ga ma’lum qildi.
Xususan, Jizzax shahridagi harbiy qismlardan birida xizmat vazifasini oʻtayotgan harbiy xizmatchilar shahardagi 29-sonli Mehribonlik uyiga tashrif buyurib, bu yerda tarbiyalanayotgan bolajonlar uchun haqiqiy bayram uyushtirib berdi.
“Hech kim mehr va eʻtibordan chetda qolmasin” shiori ostida oʻtkazilgan ushbu tadbirda Markaziy harbiy okrug, Jizzax harbiy prokuraturasi vakillari va mahalla faollari ishtirok etdi.
Mehribonlik uyida tarbiyalanayotgan bolalarda vatanparvarlik ruhini oshirish maqsadida ma’ruzalar oʻqildi, harbiy xizmatchilar tomonidan qoʻl jangi san’ati namunalaridan koʻrgazmali chiqishlar namoyish etildi. Bolajonlar ham she’r aytish, raqsga tushish kabi mahoratlarini namoyish etib, mehmonlar olqishiga sazovor boʻldi. Tadbir yakunida uyushtirilgan konsert dasturi esa barchaga birdek xush kayfiyat ulashdi.
Shuningdek, bolajonlarga 160 dan ortiq badiiy va ertak kitoblar, maktab oʻquv qurollari topshirildi. Ularning yashash sharoiti bilan yaqindan tanishildi.
Qariyalar uyida yashayotgan nuroniylar bilan dildan suhbatlar uyushtirildi. Harbiylar bayram munosabati bilan ularga qimmatbaho sovgʻalar ulashdi.
Izoh (0)