2018-yilning o‘tgan davri davomida prokuratura organlari xodimlariga pora taklif qilgan 30 shaxsga nisbatan jinoyat ishlari qo‘zg‘atildi. Bu haqda Bosh prokuratura huzuridagi Axborot-tahlil multimedia markazi ma’lum qildi.
3 marta bevosita prokuratura xodimlari, 6 holatda Iqtisodiy jinoyatchilikka qarshi kurashish departamenti xodimlari, yana 21 holatda Majburiy ijro byurosi vakillariga pora taklif qilingan.
Shu yilning 11-iyunida Toshkent viloyati, O‘rtachirchik tumani, Tutzor mahallasida yashovchi Alimardon Xalqulov Departamentning Mirobod tumani bo‘limi inspektori Mars Sultonovga 500 AQSh dollari berishni taklif qiladi. Mirobod tuman Davlat sanitariya-epidemiologiya nazorati markazining sanitariya vrachi bo‘lmish D.Aymatov “Mirobod dehqon bozori” aksiyadorlik jamiyatiga qarashli Farg‘ona shoxobchasida ruxsat berilmagan joyda, gigiyena qoidalariga zid ravishda faoliyat ko‘rsatayotganligini vaj qilib, bir yurtdoshidan pora olgan, o‘tkazilgan tezkor tadbirda u ashyoviy dalillar bilan qo‘lga tushgan. 500 dollarlik pora esa aynan o‘zi pora bilan qo‘lga tushgan Aymatovning aybini yengillatish uchun taklif qilingandi.
Departament xodimlari Qo‘qon shahar veterinariya bo‘limida tekshiruv o‘tkazadi va u yerda ko‘plab qonun buzilishi holatlari aniqlanadi. Bundan sarosimaga tushgan bo‘lim rahbari Ikromjon Esanboyev kamchiliklarini yashirish uchun departament xodimlariga pora taklif qiladi. Joriy yilning 23-iyun kuni departamentning Qo‘qon shahar bo‘limi binosida Ikromjon Esanboyev 1 million so‘m pulni pora tariqasida berayotgan vaqtda daliliy ashyolar bilan qo‘lga olindi. Uni ayblash uchun ham 211-modda naqd bo‘ldi.
Shu yilning aprel oyida “Namangan don mahsulotlari” aksiyadorlik jamiyatining moliyaviy xo‘jalik faoliyati yuzasidan o‘tkazilgan hujjatli taftishda korxonadagi qurilish va ta’mir ishlarida qator qallobliklar aniqlanadi. Ochiqroq aytganda, aksiyadorlik jamiyatida umumiy miqdori 12,2 million so‘mlik bajarilmagan qurilish ishlari “bajarildi”, deya qo‘shib yozilgan va tayinki, bu moliyaviy firib tekshiruvchilar nazariga tushgan. Qurilish-ta’mir ishlari esa Namangandagi “Hamkor agroqurilishservis” mas’uliyati cheklangan jamiyati tomonidan amalga oshirilgan edi. Tekshiruv natijasida yetkazilgan 12,2 million so‘mlik zararni naqd pul shaklida to‘lash so‘ralgan. Shunda qurilish korxonasi rahbari Ergash Mamajonov jinoiy javobgarlikka tortmaslik hamda jinoyat ishining unga nisbatan bo‘lgan qismini tugatib, sudga chiqarmaslik evaziga 300 AQSh dollarini pora tariqasida berishni taklif qiladi. U jinoyat ustida — pulni tergovchi X.Umrzoqovning xizmat stoli ustidagi kitobga solib qo‘ygan vaqtda ushlandi.
Qashqadaryo viloyatining G‘uzor tumanida, Sovlig‘ar qishlog‘ida yashovchi Toshtemir Rustamov o‘g‘lining uyida elektr energiya tarmog‘iga noqonuniy ulanib foydalanayotganligi yuzasidan tuzilgan dalolatnoma bo‘yicha belgilanadigan ma’muriy jarima miqdorini kamaytirib berish evaziga Byuroning tuman bo‘limi surishtiruvchisi Jahongir Nafasovga 1,5 million so‘m pora taklif etadi. Bu holatda ham pora berguvchining jinoyati rasmiylashtirildi va JKning 211-moddasi 1-qismi bilan jinoyat ishi qo‘zg‘aldi.
Izoh (0)