2018 йилнинг ўтган даври давомида прокуратура органлари ходимларига пора таклиф қилган 30 шахсга нисбатан жиноят ишлари қўзғатилди. Бу ҳақда Бош прокуратура ҳузуридаги Ахборот-таҳлил мультимедиа маркази маълум қилди.
3 марта бевосита прокуратура ходимлари, 6 ҳолатда Иқтисодий жиноятчиликка қарши курашиш департаменти ходимлари, яна 21 ҳолатда Мажбурий ижро бюроси вакилларига пора таклиф қилинган.
Шу йилнинг 11 июнида Тошкент вилояти, Ўртачирчик тумани, Тутзор маҳалласида яшовчи Алимардон Халқулов Департаментнинг Миробод тумани бўлими инспектори Марс Султоновга 500 АҚШ доллари беришни таклиф қилади. Миробод туман Давлат санитария-эпидемиология назорати марказининг санитария врачи бўлмиш Д.Айматов «Миробод деҳқон бозори» акциядорлик жамиятига қарашли Фарғона шохобчасида рухсат берилмаган жойда, гигиена қоидаларига зид равишда фаолият кўрсатаётганлигини важ қилиб, бир юртдошидан пора олган, ўтказилган тезкор тадбирда у ашёвий далиллар билан қўлга тушган. 500 долларлик пора эса айнан ўзи пора билан қўлга тушган Айматовнинг айбини енгиллатиш учун таклиф қилинганди.
Департамент ходимлари Қўқон шаҳар ветеринария бўлимида текширув ўтказади ва у ерда кўплаб қонун бузилиши ҳолатлари аниқланади. Бундан саросимага тушган бўлим раҳбари Икромжон Эсанбоев камчиликларини яшириш учун департамент ходимларига пора таклиф қилади. Жорий йилнинг 23 июнь куни департаментнинг Қўқон шаҳар бўлими биносида Икромжон Эсанбоев 1 миллион сўм пулни пора тариқасида бераётган вақтда далилий ашёлар билан қўлга олинди. Уни айблаш учун ҳам 211-модда нақд бўлди.
Шу йилнинг апрель ойида «Наманган дон маҳсулотлари» акциядорлик жамиятининг молиявий хўжалик фаолияти юзасидан ўтказилган ҳужжатли тафтишда корхонадаги қурилиш ва таъмир ишларида қатор қаллобликлар аниқланади. Очиқроқ айтганда, акциядорлик жамиятида умумий миқдори 12,2 миллион сўмлик бажарилмаган қурилиш ишлари «бажарилди», дея қўшиб ёзилган ва тайинки, бу молиявий фириб текширувчилар назарига тушган. Қурилиш-таъмир ишлари эса Намангандаги «Ҳамкор агроқурилишсервис» масъулияти чекланган жамияти томонидан амалга оширилган эди. Текширув натижасида етказилган 12,2 миллион сўмлик зарарни нақд пул шаклида тўлаш сўралган. Шунда қурилиш корхонаси раҳбари Эргаш Мамажонов жиноий жавобгарликка тортмаслик ҳамда жиноят ишининг унга нисбатан бўлган қисмини тугатиб, судга чиқармаслик эвазига 300 АҚШ долларини пора тариқасида беришни таклиф қилади. У жиноят устида — пулни терговчи Х.Умрзоқовнинг хизмат столи устидаги китобга солиб қўйган вақтда ушланди.
Қашқадарё вилоятининг Ғузор туманида, Совлиғар қишлоғида яшовчи Тоштемир Рустамов ўғлининг уйида электр энергия тармоғига ноқонуний уланиб фойдаланаётганлиги юзасидан тузилган далолатнома бўйича белгиланадиган маъмурий жарима миқдорини камайтириб бериш эвазига Бюронинг туман бўлими суриштирувчиси Жаҳонгир Нафасовга 1,5 миллион сўм пора таклиф этади. Бу ҳолатда ҳам пора бергувчининг жинояти расмийлаштирилди ва ЖКнинг 211-моддаси 1-қисми билан жиноят иши қўзғалди.
Изоҳ (0)