Oldinroq 500 ming dollar sarmoya kiritib, O‘zbekistonda o‘z biznesini boshlagan xitoylik investorni MIB xodimlari haydab chiqarayotgani haqida maqola e’lon qilingan, unda “Oniks” (sobiq “Mikond”) billur zavodi o‘rnida tashkil etilgan “Olmazor kichik sanoat zonasi”da mehnat qilayotgan xorijlik va mahalliy tadbirkorlar duch kelayotgan muammolar ko‘tarilgan edi. Ijtimoiy tarmoqlarda ko‘plab mulohazalarga va muhokamalarga sabab bo‘lgan maqola mas’ullarni ham befarq qoldirmadi: 6 oy avval boshlangan muammolar qisqa fursatda bartaraf etildi, deya habar beradi O‘zA.
Qayd etish joizki, eski billur zavodiga tegishli bu yerlar yillar davomida chakalakzorga aylanib, binolar nurab bitgandi. Shunday bo‘lsada, bino, inshootlarni imtiyozli shartlar asosida ijaraga berish bo‘yicha Toshkent shahar hokimining qaroriga ko‘ra, 2017-yilda tanlov savdolari asosida tender o‘tkazildi. Puxta biznes rejaga ega bo‘lgan 40 tadbirkorga 10 yillik muddatga, imtiyozli ravishda taqdim etildi. Ular bilan eksportbop, import o‘rnini bosuvchi mahsulot ishlab chiqarish va yangi ish o‘rinlari yaratish sharti bilan ijara shartnomalari tuzilgan.
— 9-avgust kuni Toshkent shahar hokimi vakillar bilan kelib vaziyatni o‘rgandi, tadbirkorlar bilan muloqot qildi, takliflar berdi, —deydi “Olmazor kichik sanoat zonasi” rahbari Umar Yunusov. — Meni ham ana shu yig‘ilishda saylashdi. Yuzlab mashina yillab yig‘ilib yotgan axlat chiqarildi. 7,5 milliard qarz yechildi. Shu oyning oxirida qolgani ham qoplanadi. Nasib bo‘lsa, yilni 3 milliard foyda bilan yakunlaymiz. Soliq masalasida muammo bor edi. Bir yarim kun ichida u ham hal etildi. Qisqa fursatda bo‘lgan o‘zgarishlarni solishtirsangiz, hayron bo‘lasiz. Obodonlashtirish ishlari olib borilmoqda, binolarning fasad qismlari ta’mirlanmoqda.
—Kichik sanoat zonamiz kichik shaharchaga aylanib bormoqda, — deydi Olmazor tumani deputati Baxtiyor Sagatov. — Bu hududda 40 korxona mavjud bo‘lib, ularda 500 ortiq ish o‘rni yaratilgan. Biz ham deputat sifatida bu muammolarni hal qilishda ishtirok etdik. Endi qarz yo‘q. Tadbirkorlar shu muammoni hal qilishda yordam bergan barcha tashkilotlardan minnatdor bo‘lmoqda.
Albatta, bu o‘zgarishlardan Olmazor tumanidagi kichik sanoat zonasidan bino olib, O‘zbekistonda o‘z biznesini boshlagan xitoylik tadbirkor Kuan Rumbo ham xursand.
— Binoni ijaraga olib, zanglamaydigan metalldan oshxona anjomlari tayyorlashga mo‘ljallangan zamonaviy uskunalarni Xitoydan olib keldim, — deydi investor. — 500 ming dollar mablag‘ kiritdim. Yana investitsiya olib kelishni mo‘ljallab turibman. O‘zbekistonda raqobatbardosh mahsulotlar ishlab chiqarishni boshladik. Muammolarimiz hal bo‘lganidan xursandman. Endi hech narsani o‘ylamay, bino atrofini obodonlashtirib, gullar va daraxtlar ekishni boshladik.
Ayni vaqtda hududdagi 18 korxonada ta’mirlash va montaj ishlari olib borilmoqda. 22 korxona ish boshlagan bo‘lib, ularning 8 tasi eksport bilan shug‘ullanmoqda. Bugungi kunda 3 ta korxona 37,3 ming dollar miqdorida eksportni amalga oshirdi.
Izoh (0)