Joriy yilning yanvar-may oylarida Adliya vazirligi “Ishonch telefoni” orqali 540 ta murojaat kelib tushdi. Ularning 206 tasi qanoatlantirildi, 232 tasiga huquqiy tushuntirishlar berilgan va 88 tasi tegishli tashkilotlarga yuborilgan.
Shuningdek, joriy yildan vazirlikda Call Center faoliyati yo‘lga qo‘yildi. Uning asosiy vazifasi – aholi bilan to‘g‘ridan-to‘g‘ri muloqotni tashkil etish, ularning huquqlari, erkinliklari hamda qonuniy manfaatlarini to‘laqonli himoya qilishga, murojaat qilishga oid konstitutsiyaviy huquqning so‘zsiz amalga oshirilishi uchun sharoitlar yaratish, “ishonch telefoni”ga qilingan murojaatlarning to‘liq, xolisona va o‘z vaqtida ko‘rib chiqilishini tashkil etishdan iborat.
Call Center ko‘p kanalli bo‘lib, o‘zbek va rus tillarida xizmat ko‘rsatmoqda. O‘zbekistonning istalgan hududidan 1 008 qisqa raqami orqali bepul bog‘lanish mumkin.
O‘tgan qisqa vaqtda bu markazga 7 ming 250 jismoniy va yuridik shaxsning qo‘ng‘irog‘i qabul qilingan.
Jumladan, Toshkent viloyati, O‘rtachirchiq tumani, Yangilik mahallasida yashovchi fuqaro A.Asqarov Toshkent viloyat “Issiqlik manbai” ishlab chiqarish birlashmasi 858 ming 979 so‘m ish haqi to‘lanmaganligidan norozi bo‘lib, “Ishonch telefoni”ga murojaat qildi. U Toshkent viloyat adliya boshqarmasi tomonidan o‘rganilib, sudga da’vo arizasi kiritilgach, sud qarori bilan fuqaroning murojaati to‘liq qanoatlantirildi.
Samarqand viloyati, Nurobod tumanida yashovchi Ch.Baratova bolasiga ikki yoshgacha nafaqa puli tayinlanmayotganligidan norozi bo‘lib, “Ishonch telefoni”ga murojaat qildi. Samarqand viloyat adliya boshqarmasi mahallaga ogohnoma kiritgach, fuqarolar yig‘ini qarori asosida fuqaroning farzandiga nafaqa tayinlandi.
Navoiy viloyat, Navoiy shahri, A.Avloniy ko‘chasida yashovchi V.Barsukov o‘zi istiqomat qilayotgan ko‘chadagi suv quvurlaridan issiq suv toshib ketganligi, mazkur masala yuzasidan Navoiy shahar “Gulobod” shirkatiga hamda “Navoiy kon metallurgiya kombinati” davlat korxonasiga bir necha marta murojaat qilganligi, biroq hech qanday natija bo‘lmaganligi yuzasidan murojaat qilgan edi.
Murojaatni Navoiy viloyat adliya boshqarmasi ko‘rib chiqib, fuqaroning issiq suv quvurlari to‘liq ta’mirlab berilishiga erishildi.
Izoh (0)