1—7-avgust kunlari Qozog‘istondagi “B. Konisbayev” o‘tkazish punktiga kirishda ko‘p kilometrli tirbandlik yuzaga kelgan, O‘zbekiston bilan chegarada 315 tacha yuk mashinasi to‘planib qolgan edi, deb yozadi Spot.
Bunday holat yuzaga kelishiga Qozog‘iston tranzit yo‘lagi orqali uzoq va yaqin xorijdan O‘zbekistonga kelayotgan yuk oqimining ko‘payishi sabab bo‘ldi.
Avgustning birinchi haftasida O‘zbekiston o‘tkazish hajmini texnik sabablarga ko‘ra, sutkasiga 100 tagacha pasaytirgan (avval 130—140 bo‘lgan). Qozog‘iston davlat daromadlari qo‘mitasining O‘zbekiston davlat bojxona qo‘mitasiga yo‘llangan xatidan keyin, sutkasiga 160 ta avtomobil o‘tkazila boshladi.
Bundan tashqari, Qozog‘iston davlat daromadlari qo‘mitasi raisi Ardak Tengebayev O‘zbekiston davlat bojxona qo‘mitasi raisi Murodjon Azimov bilan uchrashib, yuzaga kelgan vaziyat va uni hal qilish yo‘llarini muhokama qildi.
Ko‘rilgan choralar natijasida 18-avgust kuni “B. Konisbayev” o‘tkazish punktida to‘planib qolgan yuk mashinalari soni 60 tagacha kamaytirildi.
Izoh (0)