O‘zbekiston Qurolli Kuchlarining shaxsiy tarkibida harbiy xizmat va tanlangan mutaxassislikka bo‘lgan g‘urur hissini tarbiyalash maqsadida mudofaa vazirining 2017-yil 24-martdagi buyrug‘i bilan har yili avgust oyining uchinchi yakshanbasi Havo hujumidan mudofaa va Harbiy-havo kuchlari (HHM va HHK) mutaxassislari kuni deb e’lon qilingan. Shu munosabat bilan Chirchiqda birinchi marotaba harbiy havo texnikalari ishtirokida aviashou bo‘lib o‘tdi. Bu haqda Mudofaa vazirligi matbuot xizmati “Daryo”ga ma’lum qildi.
Tantanali marosim boshlanishidan oldin harbiy xizmatchilar Toshkentda joylashgan xizmat vaqtida halok bo‘lgan harbiy uchuvchilarga bag‘ishlangan monument poyiga gulchambarlar qo‘ydilar. Shundan keyin aviashouga start berildi.
Aviashouni bir juft “H215” vertolyotlari ochib berdi. Airbus kompaniyasiga tegishli ushbu vertolyotlar havoda muallaq turgan holda har ikki tarafga 360 darajada aylana oladi. Bu turdagi vertolyotlardan kursantlarni maxsus vazifalarni bajarishga o‘rgatishda foydalaniladi. Quruqlikdagi qo‘shinlarga jangovar harakatlarda ko‘maklashishga mo‘ljallangan “Mi-24” vertolyoti hamda C295 yengil harbiy-transport samolyoti o‘zlarining chiqishlari bilan yig‘ilganlar olqishiga sazovor bo‘ldi.
Uchta “H215” vertolyotlarining havoda birgalikda bajargan turli manyovrlari esa xuddi raqs misoli yig‘ilganlarni o‘ziga sehrlab qo‘ydi. Havodagi chiqishlar uchuvchidan yuqori professionallik talab qiluvchi “H125” vertolyotida bajarilgan turli murakkab harakatlar bilan yakunlandi.Mazkur vertolyotni mudofaa vazirining o‘rinbosari – HHMQ va HHK qo‘mondoni general-mayor Ahmad Burxonov boshqardi.
Shundan so‘ng bayram faxriy qorovul, havo desant kuchlarining ko‘rgazmali chiqishlari va harbiy orkestrning kuy-qo‘shiqlari bilan davom etdi.
So‘nggi yillar davomida HHM qo‘shinlari va HHK o‘zining professional mahoratini muvaffaqiyatli mukammallashtirdi. Shaxsiy tarkib tomonidan yangi va zamonaviy zenit raketa komplekslari, ko‘p maqsadli vertolyotlar, zamonaviy harbiy-transport samolyotlari o‘zlashtirildi, taktik aviatsiya parki ta’mirlandi.
Har yili HHM qo‘shinlari va HHK saflari yuzdan ortiq yosh ofitser va serjantlari bilan to‘ldirilmoqda.
Izoh (0)