Чирчиқда Ҳаво флоти куни муносабати билан Ҳарбий ҳаво кучлари авиашоу намойиш этди (фото+видео)

Ўзбекистон Қуролли Кучларининг шахсий таркибида ҳарбий хизмат ва танланган мутахассисликка бўлган ғурур ҳиссини тарбиялаш мақсадида мудофаа вазирининг 2017 йил 24 мартдаги буйруғи билан ҳар йили август ойининг учинчи якшанбаси Ҳаво ҳужумидан мудофаа ва Ҳарбий-ҳаво кучлари (ҲҲМ ва ҲҲК) мутахассислари куни деб эълон қилинган. Шу муносабат билан Чирчиқда биринчи маротаба ҳарбий ҳаво техникалари иштирокида авиашоу бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.

Тантанали маросим бошланишидан олдин ҳарбий хизматчилар Тошкентда жойлашган хизмат вақтида ҳалок бўлган ҳарбий учувчиларга бағишланган монумент пойига гулчамбарлар қўйдилар. Шундан кейин авиашоуга старт берилди.

Авиашоуни бир жуфт «Ҳ215» вертолётлари очиб берди. Airbus компаниясига тегишли ушбу вертолётлар ҳавода муаллақ турган ҳолда ҳар икки тарафга 360 даражада айлана олади. Бу турдаги вертолётлардан курсантларни махсус вазифаларни бажаришга ўргатишда фойдаланилади. Қуруқликдаги қўшинларга жанговар ҳаракатларда кўмаклашишга мўлжалланган «Ми-24» вертолёти ҳамда C295 енгил ҳарбий-транспорт самолёти ўзларининг чиқишлари билан йиғилганлар олқишига сазовор бўлди.

Учта «Ҳ215» вертолётларининг ҳавода биргаликда бажарган турли манёврлари эса худди рақс мисоли йиғилганларни ўзига сеҳрлаб қўйди. Ҳаводаги чиқишлар учувчидан юқори профессионаллик талаб қилувчи «Ҳ125» вертолётида бажарилган турли мураккаб ҳаракатлар билан якунланди.Мазкур вертолётни мудофаа вазирининг ўринбосари – ҲҲМҚ ва ҲҲК қўмондони генерал-майор Аҳмад Бурхонов бошқарди.

Шундан сўнг байрам фахрий қоровул, ҳаво десант кучларининг кўргазмали чиқишлари ва ҳарбий оркестрнинг куй-қўшиқлари билан давом этди.

Сўнгги йиллар давомида ҲҲМ қўшинлари ва ҲҲК ўзининг профессионал маҳоратини муваффақиятли мукаммаллаштирди. Шахсий таркиб томонидан янги ва замонавий зенит ракета комплекслари, кўп мақсадли вертолётлар, замонавий ҳарбий-транспорт самолётлари ўзлаштирилди, тактик авиация парки таъмирланди.

Ҳар йили ҲҲМ қўшинлари ва ҲҲК сафлари юздан ортиқ ёш офицер ва сержантлари билан тўлдирилмоқда.