Namangan viloyatining Namangan tumanidagi Tepa Qiyot mahallasi ahlining yil boshidan tinchi buzildi. Bunga tuman mutasaddilarining mahalladagi Avliyo Buzrukbuva ziyoratgohi hududida xususiy bolalar bog‘chasi qurish rejasi sabab bo‘ldi. Bu haqda “Daryo” muxbiri xabar bermoqda.
Mozorda qadimda yashab o‘tgan avliyoning qabri, atrofida 30-40 sotix maydonda esa co‘lim daraxtlar bor. Bu yerni ko‘pchilik ziyorat qiladi, ehsonlar o‘tkaziladi. Aytishlaricha, yaqinda Tojikistondan kelgan mehmon bir hafta dasturxon yozibdi. Bundan 20 yil avval shu yerga kelib, o‘g‘il farzand niyat qilgan ekan. Xudoga tavallosi yetib, o‘g‘illi bo‘libdi, biroq orada aloqalar uzilgani uchun shuncha vaqt kelishga imkon topolmagan ekan.
Xullas, mahalla fuqarolari oyoqqa turdi, shikoyatlar bilan turli idoralarga bosh urdi. Qurilish boshlanishiga yo‘l qo‘ymaslik uchun hatto navbatchilik ham tashkil etildi.
Qishloq oqsoqollaridan Erali hoji G‘aniyev shunday deydi:
— Mahallamizda 3700 kishi yashaydi, 140 o‘rinli bolalar bog‘chasi bor, ehtiyojimizni qondirib turibdi. Qo‘shni mahallalarda bolalar bog‘chasi yo‘q, o‘sha joylarga buni qursa bo‘lmaydimi? 500 yillik tarixga ega shunday aziz joyni asrab-avaylashimiz kerak. 5 oydan beri qancha idoraga bordik shu masalada. 29 tasidan javob xati oldik, lekin hech biridan amaliy yordam bo‘lmadi.
Mehnat faxriysi Malika Boltabayeva:
— Qiyot qishlog‘imiz tarixi Xorazm davlatiga borib taqaladi. Avliyo Buzrukbuva ziyoratgohi qishlog‘imizning eng tarixiy joyi hisoblanadi. Bu yerda hozir mavjud maqbara tashqarisida ham oltita avliyoning qabri borligi ota-bobolarimiz tomonidan aytib kelinadi. Tarixni buzishga hech kimning haqqi yo‘q. Qolaversa, bu joyda mahallaning sayllari, Navro‘z bayramlari, yetim-yesirlarga hatna to‘ylari o‘tkazilib kelinadi.
Mahalla faollariga ko‘ra, ziyoratgohdan 200 metr narida mavjud bo‘lgan bolalar bog‘chasi hududida 70 sotix bo‘sh joy yotibdi. Hovuz deb qurilgan qarovsiz inshootning maydoni esa 5 sotixga boradi.
Mazkur holat yuzasidan tuman hokimligi yondoshuvi bilan qiziqib, tuman hokimining qurilish bo‘yicha o‘rinbosari Habibulla O‘rinov bilan bog‘landik. U kishining aytishicha, ziyoratgoh hududida xususiy bolalar bog‘chasi qurish rejasidan voz kechilgan. Bog‘cha uchun aynan davlat maktabgacha ta’lim muassasasi yaqinidagi hudud tanlangan. “Buning uchun boshqa joy qidirilsa bo‘lmaydimi?” degan savolimizga xususiy bog‘chani qurishga bel bog‘lagan tadbirkor ham shu mahalladan ekanligi, o‘zida qurish istagi borligini bildirdi.
Aytilgan so‘z— otilgan o‘q. Biz hokim o‘rinbosarining va’dasiga ishondik. Har ehtimolga qarshi, ma’lumot uchun: Namangan tumanidagi 54 ta mahalladan 29 tasida bolalar bog‘chasi umuman yo‘q.
P.S. Ziyoratgoh bilan bog‘liq mojarolar boshlanganda qishloq fuqarolarini arz-dodini hokimlikka yetkazgan, idorasini o‘sha yerga ko‘chirib, quruvchilarni hududga qo‘ymagan Tepa Qiyot MFY raisi Abdulaziz Uzaqovning kuni kecha arizasi olindi. Albatta, o‘z ixtiyoriga ko‘ra...
Izoh (0)