Oliy Majlisi Senati raisining birinchi o‘rinbosari Sodiq Safoyevning AQSh Xususiy xorijiy investitsiyalar korporatsiyasi (OPIC) vitse-prezidenti D. Boxigien boshchiligidagi delegatsiya bilan uchrashuvi bo‘lib o‘tdi. Bu haqda Senat axborot xizmati ma’lum qildi.
Mehmonlar mamlakatda o‘z faoliyatini qayta boshlagan Xususiy xorijiy investitsiyalar korporatsiyasi — AQSh hukumati huzuridagi agentlikning maqsadi O‘zbekiston bozoriga mablag‘lar kiritishda amerikalik tadbirkorlarga kreditlar va kafolatlar berish orqali ko‘maklashishdan iborat ekanligini ta’kidladi.
Shuningdek, korporatsiya xususiy va boshqariladigan investitsiya jamg‘armalarini tashkil etishni ham qo‘llab-quvvatlaydi. Kapital bilan qo‘llab-quvvatlashdan tashqari, OPIC rivojlanayotgan mamlakatlarga boshqaruv ko‘nikmalari va moliyaviy ekspertizadan foydalanishda ham yordam ko‘rsatadi. Bu rivojlanayotgan mamlakatlarda iqtisodiy taraqqiyotni kengaytirishda hamda tadbirkorlar uchun yangi imkoniyatlar yaratishda muhim omil hisoblanadi.
Suhbat chog‘ida korporatsiya vakillari mamlakatda siyosiy va iqtisodiy vaziyat barqarorligi hamda investorlar xavfsizligi mustahkam ta’minlanayotganligi tufayli O‘zbekiston bozoriga kapital kiritish istiqbolli ekanligini qayd etdi.
Ma’lumot uchun, bugungi kunda korporatsiya aktivlari 20 milliard dollarni tashkil etadi. OPIC jahonning 160 ta rivojlanayotgan mamlakatida faoliyat olib boradi va axborot texnologiyalari, sog‘liqni saqlash, ta’lim, infratuzilma, telekommunikatsiyalar, moliyaviy xizmatlar, uy-joy bozori va qishloq xo‘jaligi kabi turli sohalarda biznesni moliyalashtirishda ko‘mak beradi.
Izoh (0)