“Milan” biryo‘la ikki futbolchini o‘z safiga qo‘shib oldi

Italiyaning “Milan” jamoasi Diyego Laksalt hamda Samuel Kastilyexoni o‘z safiga qo‘shib olganini e’lon qildi.

Urugvaylik Laksalt “Jenoa”dan olib kelindi. Diyego o‘rniga genuyaliklar jamaosiga Janluka Lapadula berilgan. Urugvaylik futbolchi “Jenoa” safida 117 uchrashuvda qatnashib, 8 ta gol urgan va 12 ta golli uzatmani amalga oshirgan.

Samuel Kastilyexo esa Ispaniyaning “Vilyarreal” jamoasidan klubga taklif etildi. Karlos Bakka esa “sariq suvosti kemasi”ga yuborildi. Kastilyexo La Liganing o‘tgan mavsumida 30 ta uchrashuvda qatnashib, 6 ta gol urib, 12 ta golli uzatmani amalga oshirgan.

Milanliklar shu tariqa ushbu mavsumdagi transfer kampaniyasini yakunlaganini e’lon qildi.