Osiyo o‘yinlari—2018 boshlanishiga hamma narsa shay, muhit esa ajoyib! Olimpiya shaharchasidan “Daryo” fotoreportaji

Bugun, 18-avgust sanasida Indoneziyada XVIII Osiyo o‘yinlari start oladi va u 2-sentabrga qadar davom etadi. “Daryo” muxbiri O‘zbekistondagi bir qator OAV vakillari bilan birga ayni damda musobaqani yoritish uchun Jakarta shahrida bo‘lib turibdi. Quyida muxbirimizning safarning birinchi kungi taassurotlari bilan tanishishingiz mumkin, aziz o‘quvchi!

Xo‘sh, avvalosi, XVIII Osiyo o‘yinlari o‘tkaziladigan shaharlar bilan qisqacha tanishib olsak. Indoneziya 4 ta yirik va 17 mingdan ziyod mayda orollardan iborat mamlakat. Jakarta va Palembang mos ravishda 2 ta yirik orolda joylashgan — Yava hamda Sumatra. Ular Osiyo o‘yinlari uchun 4 ta yirik sport obyektini tayyor qilib qo‘yishgan. Shularning 3 tasi Jakartada joylashgan bo‘lib, yana 1 tasi Palembangda qad rostlagan.

Ikki shahar orasidagi masofa deyarli 620 kilometrni tashkil qiladi.

Palembang shahri sohil voleyboli, kanoe hamda akademik eshkak eshish, bouling, tennis, ayollar futboli, klimbing, o‘q otish kabi sport turlari vakillarini qabul qiladi. Qolgan barcha sportchilar Jakartada musobaqalarga kirishadi.

17-avgust sanasida O‘zbekistondan kelgan OAV vakillari Jakartdagi sportchilar istiqomat qiladigan Olimpiya shaharchasi — Athlete Village Kemayoran’ni ko‘zdan kechirish imkoniyatiga ega bo‘ldi.

Athlete Village Kemayoran — Osiyo o‘yinlari—2018 uchun maxsus bunyod etilgan. Bu yerda bir-biridan baland bir nechta ulkan binolar qad rostlagan. Ularda ayni damda sportchilar istiqomat qilmoqda. Musobaqalar yakuniga yetgach mazkur binolar Jakarta aholisi uchun sotuvga qo‘yiladi.

O‘zbekistonlik sportchilar 32 qavatli binoning 2-3-4-5-qavatlariga joylashgan. Ular uchun barcha sharoitlar yaratilgan. Milliy olimpiya qo‘mitasi ishchi guruh ham shu yerda. Ular uchun ham 5-qavatdan alohida xona band qilingan.

Jurnalistlar Olimpiya shaharchasiga kirishdan avval ro‘yxatdan o‘tishlari lozim. Buning uchun ularga avvaldan taqdim etilgan akkreditatsiyalari kerak bo‘ladi. Shaharchaga kirib kelishingiz bilan yuzlab volontyorlar (ko‘ngillilar) sizni qarshi oladi. Ularning ko‘pchiligi kollej hamda universitet o‘quvchi va talabalari. Aksariyati ingliz tilida yaxshi so‘zlashadi. (Har holda bizga duch kelgan bitta bolakayni aytmasa, hammasi “OK!”).

Darvoqe, sportchilar ham shaharchaga kirishdan avval shu yerda ro‘yxatdan o‘tkaziladi.

Shaharcha bo‘ylab Osiyo o‘yinlarining ajoyib muhiti hukmron. Har qadamda Osiyo o‘yinlari timsollarini uchratish mumkin.

Shaharchada pullarni ayirboshlash shoxobchalari xizmat ko‘rsatish uchun shay holatga keltirilgan. Shuningdek, kartalardan pul yechish bu yerda muammo emas. 1 dollar, taxminan, 15 ming Idoneziya rupiyasiga teng. 100 dollarni rupiyaga aylantirsangiz, siz o‘zingizni millionerlar safidaman, deb hisoblasangiz bo‘laveradi!

Mamlakatda mobil aloqa tizimidan muammo deyarli yo‘q. Hammasi joyda, xususan, shaharchada ham bepul Wi-fi xizmati yo‘lga qo‘yilgan. Bundan tashqari mobil aloqa kompaniyalari shu yerning o‘zidan xizmat ko‘rsatish uchun ko‘chma shoxobchalar tashkil qilish bilan birga, sotuvchi-agentlarni ham mazkur dargohga jalb etgan.

Sportchilar va delegatsiya a’zolari uchun kun-u tun bepul xizmat ko‘rsatuvchi kattagina oshxona ham ishlab turibdi. Eshik oldida sizni indoneziyalik go‘zallar yuzda tabassum bilan kutib oladi (Darhaqiqat, indoneziyaliklarning hammasi siz yordam so‘rasangiz yordamga tayyor va albatta, yuzda tabassum bilan).

Har bir mamlakat milliy olimpiya qo‘mitalarining ishchi guruhlari uchun maxsus xonalar ajratilgan.

Sportchilarning yashashlari uchun ham barcha sharoitlar muhayyo.

Hozircha shular. Ochilish marosimigacha diydorlashguncha, omon bo‘ling, azizlar!

• Musobaqada 40ta sport turi bo‘yicha bellashuvlar o‘tkaziladi;
• sportchilar 67ta yo‘nalishda bahslarga kirishadi;
• 465ta medallar jamlanmasi o‘ynaladi;
• o‘yinlarni 5000 nafardan ziyod ommaviy axborot vositalari bevosita voqea joyidan yoritib boradi;
• 15000 nafarga yaqin sportchi va rasmiy shahslar musobaqada ishtirok etadi;
• 13000 nafardan ziyod ko‘ngillilar mehmonlarga o‘zlarining beminnat yordamlarini ko‘rsatadi;
• Osiyo o‘yinlari ilk marotaba ikki shaharda (Jakarta va Palembang) o‘tkazilmoqda.;