Осиё ўйинлари—2018 бошланишига ҳамма нарса шай, муҳит эса ажойиб! Олимпия шаҳарчасидан «Дарё» фоторепортажи

Бугун, 18 август санасида Индонезияда XVIII Осиё ўйинлари старт олади ва у 2 сентябрга қадар давом этади. «Дарё» мухбири Ўзбекистондаги бир қатор ОАВ вакиллари билан бирга айни дамда мусобақани ёритиш учун Жакарта шаҳрида бўлиб турибди. Қуйида мухбиримизнинг сафарнинг биринчи кунги таассуротлари билан танишишингиз мумкин, азиз ўқувчи!

Хўш, аввалоси, XVIII Осиё ўйинлари ўтказиладиган шаҳарлар билан қисқача танишиб олсак. Индонезия 4 та йирик ва 17 мингдан зиёд майда ороллардан иборат мамлакат. Жакарта ва Палембанг мос равишда 2 та йирик оролда жойлашган — Ява ҳамда Суматра. Улар Осиё ўйинлари учун 4 та йирик спорт объектини тайёр қилиб қўйишган. Шуларнинг 3 таси Жакартада жойлашган бўлиб, яна 1 таси Палембангда қад ростлаган.

Икки шаҳар орасидаги масофа деярли 620 километрни ташкил қилади.

Палембанг шаҳри соҳил волейболи, каноэ ҳамда академик эшкак эшиш, боулинг, теннис, аёллар футболи, климбинг, ўқ отиш каби спорт турлари вакилларини қабул қилади. Қолган барча спортчилар Жакартада мусобақаларга киришади.

17 август санасида Ўзбекистондан келган ОАВ вакиллари Жакартдаги спортчилар истиқомат қиладиган Олимпия шаҳарчаси — Athlete Village Kemayoran’ни кўздан кечириш имкониятига эга бўлди.

Athlete Village Kemayoran — Осиё ўйинлари—2018 учун махсус бунёд этилган. Бу ерда бир-биридан баланд бир нечта улкан бинолар қад ростлаган. Уларда айни дамда спортчилар истиқомат қилмоқда. Мусобақалар якунига етгач мазкур бинолар Жакарта аҳолиси учун сотувга қўйилади.

Ўзбекистонлик спортчилар 32 қаватли бинонинг 2-3-4-5-қаватларига жойлашган. Улар учун барча шароитлар яратилган. Миллий олимпия қўмитаси ишчи гуруҳ ҳам шу ерда. Улар учун ҳам 5-қаватдан алоҳида хона банд қилинган.

Журналистлар Олимпия шаҳарчасига киришдан аввал рўйхатдан ўтишлари лозим. Бунинг учун уларга аввалдан тақдим этилган аккредитациялари керак бўлади. Шаҳарчага кириб келишингиз билан юзлаб волонтёрлар (кўнгиллилар) сизни қарши олади. Уларнинг кўпчилиги коллеж ҳамда университет ўқувчи ва талабалари. Аксарияти инглиз тилида яхши сўзлашади. (Ҳар ҳолда бизга дуч келган битта болакайни айтмаса, ҳаммаси «ОК!»).

Дарвоқе, спортчилар ҳам шаҳарчага киришдан аввал шу ерда рўйхатдан ўтказилади.

Шаҳарча бўйлаб Осиё ўйинларининг ажойиб муҳити ҳукмрон. Ҳар қадамда Осиё ўйинлари тимсолларини учратиш мумкин.

Шаҳарчада пулларни айирбошлаш шохобчалари хизмат кўрсатиш учун шай ҳолатга келтирилган. Шунингдек, карталардан пул ечиш бу ерда муаммо эмас. 1 доллар, тахминан, 15 минг Идонезия рупиясига тенг. 100 долларни рупияга айлантирсангиз, сиз ўзингизни миллионерлар сафидаман, деб ҳисобласангиз бўлаверади!

Мамлакатда мобил алоқа тизимидан муаммо деярли йўқ. Ҳаммаси жойда, хусусан, шаҳарчада ҳам бепул Wi-fi хизмати йўлга қўйилган. Бундан ташқари мобил алоқа компаниялари шу ернинг ўзидан хизмат кўрсатиш учун кўчма шохобчалар ташкил қилиш билан бирга, сотувчи-агентларни ҳам мазкур даргоҳга жалб этган.

Спортчилар ва делегация аъзолари учун кун-у тун бепул хизмат кўрсатувчи каттагина ошхона ҳам ишлаб турибди. Эшик олдида сизни индонезиялик гўзаллар юзда табассум билан кутиб олади (Дарҳақиқат, индонезияликларнинг ҳаммаси сиз ёрдам сўрасангиз ёрдамга тайёр ва албатта, юзда табассум билан).

Ҳар бир мамлакат миллий олимпия қўмиталарининг ишчи гуруҳлари учун махсус хоналар ажратилган.

Спортчиларнинг яшашлари учун ҳам барча шароитлар муҳайё.

Ҳозирча шулар. Очилиш маросимигача дийдорлашгунча, омон бўлинг, азизлар!

• Мусобақада 40та спорт тури бўйича беллашувлар ўтказилади;
• спортчилар 67та йўналишда баҳсларга киришади;
• 465та медаллар жамланмаси ўйналади;
• ўйинларни 5000 нафардан зиёд оммавий ахборот воситалари бевосита воқеа жойидан ёритиб боради;
• 15000 нафарга яқин спортчи ва расмий шаҳслар мусобақада иштирок этади;
• 13000 нафардан зиёд кўнгиллилар меҳмонларга ўзларининг беминнат ёрдамларини кўрсатади;
• Осиё ўйинлари илк маротаба икки шаҳарда (Жакарта ва Палембанг) ўтказилмоқда.;