Eron prezidenti Hasan Ruhoniyning joriy yil avgust oyiga rejalashtirilayotgan O‘zbekistonga tashrifi arafasida Rossiya Fanlar akademiyasi Jahon iqtisodiyoti va xalqaro aloqalar instituti postsovet tadqiqotlar markazi eksperti Farhod Ibragimov Eron va O‘zbekiston yetakchilari qanday yo‘nalishlar bo‘yicha sheriklik haqida kelishib olishi, kun tartibidan qanday masalalar o‘rin olishi yuzasidan o‘z fikrini bildirib o‘tdi, deb yozadi “Sodrujestvo” press-klubi.
Eron va O‘zbekiston ikki tomonlama hamkorlikni kengaytirishi mumkin bo‘lgan bir yo‘la bir nechta yo‘nalishlarni muhokama qilishi kerak. Umumiy chegara yo‘qligiga qaramay, Eron O‘zbekistonni mintaqadagi eng muhim o‘yinchilardan biri sifatida ko‘radi. Ikkala mamlakat ham terrorizmga qarshi kurashdan iborat umumiy maqsadni ko‘zlaydi.
Iqtisodiy aloqalarni rivojlantirish va terrorizmga qarshi kurash Shavkat Mirziyoyev va Hasan Ruhoniy uchrashuvi doirasidagi asosiy masalalar bo‘ladi.
Eron AQShning Keng qamrovli qo‘shma harakatlar rejasidan chiqishi bilan bog‘liq iqtisodiy qiyinchiliklarga qaramay, Yaqin Sharqda yetarlicha ahamiyatli davlat bo‘lib qolmoqda, va Toshkentda buni yaxshi tushunishadi.
Eronning O‘zbekistondan manfaatdorligi Tehronning Tojikiston bilan aloqalari chigallashib qolgani bilan bog‘liq. Eron Markaziy Osiyoda yaqin sheriklik aloqalarini rivojlantirish mumkin bo‘lgan alternativ ishtirokchini qidirmoqda.
Shuningdek, yaqin orada Eron va Ozarbayjon hududi orqali Mumbay portini Sankt-Peterburg bilan bog‘lovchi xalqaro transport yo‘lagi loyihasi ishga tushadi. O‘zbekiston Markaziy Osiyoning ilg‘or mamlakatlaridan biri sifatida sheriklik shartlari asosida ushbu loyihaga qo‘shilishi mumkin.
Izoh (0)