Oliy Majlis Senati raisi Nig‘matilla Yo‘ldoshev va Qonunchilik palatasi spikeri Nurdinjon Ismoilov Surxondaryo viloyati Muzrabot tumanida ilg‘or fermerlar, to‘rtta sektorlar va qishloq xo‘jaligi tashkilotlari rahbarlari bilan uchrashdi. O‘zA xabariga ko‘ra, 4-avgust kuni bo‘lib o‘tgan tadbirda senatorlar, deputatlar, oqsoqollar, hududdagi sektorlar va qishloq xo‘jaligi korxonalari rahbarlari, fermerlar ishtirok etgan.
Uchrashuvda Prezident Shavkat Mirziyoyev raisligida 31-iyul kuni g‘o‘za rivojini jadallashtirish, g‘alla o‘rimidan bo‘shagan maydonlarga takroriy ekinlar ekish, aholi tomarqasidan samarali foydalanish va qishloq xo‘jaligi mahsulotlarini eksport qilish masalalariga bag‘ishlangan videoselektor yig‘ilishida belgilab berilgan vazifalar ijrosi, qishloq xo‘jaligi mahsulotlari ishlab chiqaruvchilar uchun yaratilayotgan sharoitlar haqida atroflicha so‘z yuritilgan.
Surxondaryo viloyatida 2018-yilda3 048 fermer xo‘jaligi 78 500 gektardan ortiq maydonda g‘o‘za parvarishlamoqda. Ayni paytda paxtadan mo‘l hosil yetishtirish uchun vohada tegishli chora-tadbirlar ko‘rilmoqda. Ob-havo me’yoridan issiq kelayotgani bois sharbat usulida tungi sug‘orish, kultivatsiya, g‘o‘zani chilpish va boshqa dala yumushlarini sifatli tashkil etishga e’tibor qaratilmoqda.
“Biroq ayrim hududlarda g‘o‘za parvarishida kamchiliklarga yo‘l qo‘yilmoqda, ayrim sektor rahbarlari mas’uliyatni chuqur his etmayotir. G‘o‘za parvarishi uchun zarbdor pallada bu boradagi ishlarni sifatli bajarish hosilga hosil qo‘shishda muhim ahamiyat kasb etadi. Uchrashuvda shular haqida fikr almashilib, galdagi vazifalar belgilab olindi”, — deyiladi O‘zA axborotida.
Bir kunning o‘zida Qiziriq va Sherobod tumanlari fermerlari bilan ham shunday uchrashuvlar o‘tkazilgan. Tadbirlarda bir guruh fermerlar, hududdagi fermerlarga xizmat ko‘rsatuvchi korxonalar rahbarlariga Prezident Shavkat Mirziyoyev nomidan qimmatbaho sovg‘alar topshirilgan.
5-avgust kuni Denov tumanida Oltinsoy, Uzun, Denov va Sariosiyo tumanlari uchun, Jarqo‘rg‘on tumanida Sho‘rchi, Jarqo‘rg‘on va Qumqo‘rg‘on tumanlari fermerlari bilan uchrashuvlar o‘tkazilishi rejalashtirilgan edi.
Izoh (0)