Eski tanishim, Beruniy mahallasida yashovchi ikkinchi guruh nogironi Umidjon Qodirov telefon qilib qoldi.
— Prezidentimizga men va menga o‘xshagan nogironlar nomidan minnatdorchiligimizni matbuot orqali yetkazsangiz, — dedi u hayajonlanib. — “Daryo” saytining o‘quvchilari ko‘p, shunga yozing, — yana qo‘shib qo‘ydi.
Umidjon ancha yillardan buyon nogiron, harakatlana olmaydi. Shu kuni Farg‘ona shahar 2-sektor shtabi a’zolari prokuror M.Rahmonov boshchiligida ularning xonadoniga kelib nogironlik aravachasi, dori-darmon sovg‘a qilib ketishgan ekan.
2-sektor shtabi orasta, didli jihozlangan. Murojaatlar, uning ijrosi daftarini kuzatamiz. Shu kuni shtab a’zolari Umidjonga o‘xshagan Huvaydo, Navbahor, Mehribonlik, Hamkorlik kabi yana bir necha MFYlaridagi ehtiyojmand nogironlar xonadoniga ham tashrif buyurib aravachalar topshiribdilar.
— Biz O‘zbekiston Respublikasi Prezidentining “Hududlarning jadal ijtimoiy-iqtisodiy rivojlanishini ta’minlashga doir ustuvor chora-tadbirlar to‘g‘risida”gi qarori asosida barcha yo‘nalishlarda ish tashkil etdik, — deydi 2-sektor shtabi a’zosi Jahongir Ismoilov. Hududdagi muammolarni har bir xonadonga kirib oilalarning turmush tarzi bilan tanishgach aniqlab oldik va uni bartaraf etish “yo‘l xaritasi”ni ishlab chiqdik. Faoliyatimiz asosan ana shu reja asosida yo‘lga qo‘yilgan.
Biz “yo‘l xaritasi”dagi yozuvlar manzili tomon yo‘l oldik. Xo‘jamag‘iz, Huvaydo MFYda yashovchi H.Hakimov, N.Sultonovlar eshitish moslamasi sovg‘a qilganlaridan, o‘nta MFYdagi ko‘p bolali xonadon egalari farzandlariga kiyim-kechak to‘plamlari sovg‘a qilinganidan, 40 ta ehtiyojmand oilalarga oziq-ovqat, bemorlarga dori-darmonlar tarqatilganidan minnatdorchilik bildirib, insonparvar siyosat yuritayotgan davlatimiz rahbari va 2-sektor mas’ullarini duo qildilar.
— Savurbuloq MFY markazdan chetroqda joylashgan. Shuning uchunmi, sektor rahbari bizning mahallaga tez-tez kelib turadi, — deydi yoshi ulug‘ Abdug‘ani ota. – Biz ijtimoiy dorixona uzoqda ekanini aytgandik. Masala tez hal bo‘ldi. Endi haftada ikki marta ijtimoiy dorixonaning o‘zi ko‘chma faoliyatini yo‘lga qo‘yib, shu yerning o‘zida kerakli dori-darmonni olyapmiz.
— Mahallamizda to‘rt mingdan ziyod aholi yashaydi, — deydi jo‘ydamlik Zuxra opa Hamidova. – 23 ta kam ta’minlangan oila farzandlariga avtobus tashkil etib “Hayvonot bog‘i”ga sayohat uyushtirdilar. Mening nabiram ham bor edi ular orasida. O‘shanda oilamdagi eng quvonchli kunlardan biri bo‘ldi...
Farg‘ona shahridagi 2-sektorda 18 ta MFY, 22942 ta xonadon, 74446 nafar axoli bor. Ularning 14441 nafari voyaga yetmaganlar, 1045 nafari nogiron, 367 ta extiyojmand oila, 24 ta yakka yolg‘izlar mavjud. Bu raqamlar ortidagi har bir fuqaro, oila sektor a’zolarining doimiy e’tibori, g‘amxo‘rligida. Muammolar xam shunga yarasha. Birgina Huvaydo mahallasi hududida 1300 metr ichimlik suvi quvuri, 10 km elektr tarmoqlari yangilandi. 14 ta kam ta’minlangan oila uy joylari ta’mirlandi. 1200 metr shisha tolali kabel yotqizilib, 1 km yo‘l asfaltlandi, 85 ta ko‘cha chiroqlari o‘rnatildi. Hududdagi ehtiyojdan kelib chiqib, 230 o‘rinli xususiy bog‘cha qurib bitkazildi.
Hududdagi boshqa mahallalarda ham shu kabi ishlar qizg‘in olib borilyapti.
Sektorda yana bir ibratli tajriba yo‘lga qo‘yilgan. Har ikki haftada shtabda “Tadbirkorlar kuni” o‘tkaziladi. Ularning muammolari o‘rganilib yechim ustida choralar ko‘riladi.
— Avvaliga amaldorlar uyma-uy yurib qoldi, bu ham bir o‘tkinchi tadbir bo‘lsa kerak, deb o‘ylagandim, — deydi Umidjon. – Yo‘q, men adashibman, bizga e’tibor, g‘amxo‘rlik izchil, doimiy tus oldi. Bu davlatimiz siyosatiga aylandi. Biz shu siyosatni tashkil etayotgan, yuritayotganlardan rozimiz. Muxbir aka, shu gaplarimni ham yozing!
O‘zbekiston Prezidenti Shavkat Mirziyoyev tashabbusi bilan barcha sohada olib borilayotgan islohotlardan ko‘zlangan maqsad ham aslida xalq roziligiga erishish emasmidi?
Muhammadjon Obidov
Izoh (0)