Британияда ИШИДга алоқадор энг ёш жиҳодчи қиз умрбод қамоққа ҳукм қилинди

Буюк Британияда суд ИШИД террорчилик ташкилотига алоқадор энг ёш жиҳодчи қизга нисбатан ҳукм чиқарди, деб ёзади Sky News.

18 ёшли Сафа Булар 13 йиллик жазони мажбурий ўташ муддати билан умрбод қамоқ жазосига маҳкум этилди (у афв ҳақида ушбу муддат ўтганидан кейингина арзнома бериши мумкин).

Қизни ИШИД жангариси Навид Ҳусайн гуруҳга жалб қилган вақтида у мактаб имтиҳонларига тайёрланаётган бўлган. Қиз ўзидан 15 ёш катта Ҳусайн билан турмуш қуриш учун Сурияга кетишга уринган, аммо полиция бунга йўл қўймаган. Эркак кейинчалик учувчисиз учар қурилмалар ҳужумида ўлдирилган.

Тергов ҳужжатларига кўра, жиҳодчи қиз Британия музейида ўз опаси ва онаси билан теракт уюштиришни режалаштирган. У режани ишлаб чиқишда бош ролни ўйнаган. Опаси ва онаси Вестминстер саройида пичоқ билан ҳужумларни режалаштирган. Иккаласи ҳам ўз айбига иқрор бўлган. Қизни 16 йиллик жазони мажбурий ўташ муддати билан умрбод қамоққа, онасини эса 6 йил-у 9 ой қамоққа ҳукм қилишди.

Булар ИШИДнинг Буюк Британиядаги ягона аёллар ячейкасининг энг ёш ва энг сўнгги маҳкумаси бўлди. Қиз адвокатининг сўзларига кўра, у 15 ёшида террорчилар таъсирига тушиб қолган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.