Chikago shahri kam ta’minlanganlarga har oyda 500 dollardan berishni ko‘zlamoqda

Chikago AQShdagi bazaviy daromadni ta’minlash bo‘yicha universal dastur sinovi o‘tkaziladigan yirik shahar bo‘lishi mumkin. Buning uchun shahar rahbariyati ba’zi oilalarga har oyda 500 dollardan berishga rozi bo‘lishi kerak. Bu haqda Forum Daily xabar berdi.

Shahar deputatlari Chikagoda bazaviy daromadni ta’minlash dasturini amalga kiritish g‘oyasini qo‘llab-quvvatlashini bildirgan. Dastur shahardagi 1000 ta kam ta’minlangan oilaga tatbiq etiladi.

Qonun loyihasining muallifi mahalliy deputat Ameyya Pavar bo‘lib, u qonunchilik organining 50 nafar a’zosi orasida 36 ta imzo yig‘gan.

Pavarning so‘zlariga ko‘ra, bu dasturni joriy qilishning zarurati ko‘plab jarayonlarning avtomatlashish xavfi bilan asoslangan. Bu esa amerikaliklarning ishga joylashish imkoniyatlariga ta’sir qilishi mumkin. Shuning uchun bu kabi ko‘mak AQShdagi oilalarning ko‘pchiligida normal hayotni ta’minlash uchun zarur hisoblanadi. Siyosatchining fikricha, bunday oilalar favqulodda holatlar uchun juda kam mablag‘ asrab qo‘ygan bo‘ladi.